Макрукьядеш, шилтахъчидеш ва чябхъиндеш жигарчерли дунъяличир тIинтIдирули сари. Гьалаб халати адамти-ургар, улкни-ургар диалри илдигъунти анцIбукьуни кадиркути, гьанна – жагьти дурхIни-ургарра илди жигарчердиубли сари. Телевизорлизиб ца передачаличи лехIризурхIели, илар гьаладирхьути — мардешла анцIбукьуни диъниличи ну тамай рирххIеурра.
Макрукьябани биргIябиргили, гIямру заядарибти дурхIни илаб чебиахъулри. Жура-журала шагьуртазир хIиллаби, дурадеркIибти ва илдигъунти хъарбаркьуни детерхахъес хIядурбиубти гIулухъаби илаб лебри. Ца 28 дус риубси рурси, 27 дус туснакъла каратурлири. Гьанналаур деркIибтицад дусми туснакълар деркIес илис чевкъули саби. Макрукьябани ва улкала душмантани нушала ишабти жагьилтала гIямру заядарес халаси къайгъи бирули саби. Илдала гIякьлу-дагьри думкьахъути шуртIрира гьаладирхьули сари. Арцличи хьулбикIути жагьилти, аги-кьяйдала асуртачи пикрибулхъули ахIен. Ахир сегъуна бакIесара ибси суал мурталра адамла бекIлизиб биэс гIягIниси саби. Ил масъала бекIлизи кабуцибсини, гьарил сунела баркьудилис жавабкардеш дихес хIяжатли биъниличилара хъумхIерту.
ЖамигIятлизир, школабазир ва цархIилти учреждениебазир гIулухъаби ва жагьилти-ургар ил шайчирти мяхIкамдешла далдуцуни цIакьдарили дурадуркIес гIягIнибиркур. Гьамадси тяхIярли арц дарес мурталра вируси ахIен. Дахъалгъунти анцIбукьуназир илди къурушмас вегIла гIямрула дусми дедес чевкъули бирар. «Матъалси нуси тIимкьлизиб бирар» бикIуси буралара лебсигу. Ил буралализиб мекелли мурхьси мягIна бухIнабуцили саби. Адамлис вегIла жайчиб ахIерси се лебсив? Ил багьандан тIимкьлизи хIейкес, пикриухъи вяшикIес чебиркур. ГIямрулизиб се-дигара бируси саби. Севан-биалра адам чеввалкIес асубируси саби. ХатIа барибхIели, уруххIейубли бегIтази бурниличиб гIяхIси лебси ахIен. Макрукьябала кьялшубази дикниличи шакдикибхIели, бусягIятал хIушала бегIтачи дугьадилзеная. Неш-дудешлаван дурхIяличи уркIи чилалра изуси ахIен. Илданиван хIушаб гIур чилилра кумекра бируси ахIен. Ил багьандан, гьамадли арц дарес ибси пикри бекIлизибад убкасили, гIякьлу-дагьри думкьахъути секIулти гьарахъдарили, жамигIятлис пайдаладирули ва хъалибарглис разидеш бихули, мяхIкамли вяшдикIеная.
ПатIимат Шахова
