ГIяхIмад Ибрагьимов Дахадаевла районна КIишала шилизивадси сай. Ил адамтас гIяхIдеш бирес къайгъилизивси ва дурхIни ункъли бяркъличи би­кахъибси дубурлан сай. Дахъал дусмазив ил Дахадаевла районна депутатунала собраниела председательли калунсири. Ил манзилла ухIнав район гьалабяхI арбукес ва адамтала яшавла шуртIри ункъдиахъес багьандан белгиси хIянчира дураберкIиб илини.
ГIергъити дусмазив ГI.Ибрагьимов КIишала шилизибси дурхIнала анхъла заведующийли узули сай. ЧеалкIуси наслула вакилтала гIямрулизир къулайдешуни диахъесра къайгъилизив сай ил. Гьайгьайрагу, дурхIнала анхъла заведующийла хIянчили чекайзни, сабур, педагогла пагьму тIалабдирути сари. Илдигъунти къиликъуначил ГI.Ибрагьимов вегIиубсира сай.
Амма ГIяхIмадла бекIлибиубсигъуна гьарбиз саби илала хъалибарг кIишанталацунра ахIи, лебилра дахадаевланталара пахрули бетаъни. Сунела гIямрула марси гьалмагъ Аминатличил барх илини абикьурти дурхI­нанира чучи лайикьти санигIятуни чердикIиб ва жавабкардешличил бузули саби. Илала уршбазивад­ли хаслира хIурматличил гьанушес лайикьли сай МяхIяммад Ибрагьимов, сайра ДР-ла духIнарти къуллукъунала министрла заместительла къуллукъличи ка­турси. МяхIяммадли Волгоградла следственная ака­демия таманаибсири ва гIядлу-зегъа далтахъути органтазив узули калунсири. ГIур ил следственное уп­равлениела начальникла къуллукъличи катурсири. БусягIятра иличи хъарбарибси къуллукъли дубурла санигIятлашалти черяхIти устадешлис бикьридеш дирули сари.
ГIяхIмадла ГIямар бикIуси уршилира ФСБ-лизив узули, гIяхIти сархибдешуни диахъуб.
Рурсили отоларингологла санигIят чеббикIиб ва адамтала арадешлис къараулбирнила хIянчи гIя­хIил бузахъули сари.
МяхIяммад Ибрагьимов илгъуна ахъси къуллукъличи катниличил Ибрагьимовхъала хъалибарг мубаракбарес лайикьли саби. Гьаннала гIергъира илди пагьмучебти ва яхI-ламусли ахъбуцибти багьадуртас бегI гьалабси яргализиб чархла арадеш, гIямрулизир чедибдешуни, гьарбизуни ва бузерилизир сархибдешуни дулгехIе.
Дахадаевла районна бекI МяхIяммад ГIяб­дул­кьадировлира МяхIямад Ибрагьимов ДР-ла духI­нар­ти къуллукъунала министрла заместительла къул­лукъличи катниличил бархбасахъи, сунела ва ад­министрацияла лебилра аппаратла шайзивадли ГIяхI­мад МяхIяммадович мубаракирули сай ва илала пер­герси хъалибарглис дунъяла лерилра гIяхIдешуни дул­гули сай.
Дахадаевла районна администрацияла пресс-служба