Халкьлис кумекбирахъес ЧевяхIсини рархьибси сари рикIес рирус иш дила макьалала игитлис. ХIясанова Узлипат ГIусмановначила сари гъай.
Ну иличил 2014 ибил дуслизир тянишриубсири, университетлизи ручIес карерхурхIели. Илар бегIлара бархьдеш дигуси, студентунас мурталра кумекбарес хIядурси преподаватель сарливан нуни ил рагьурсири. Гьанна биалли, гIергъити дусмазир Узлипат ХIясанова ДР-ла Халкьла Собраниела депутатра сари. Ил дазуличир Узлипат ГIусмановнани дирути хIянчила ахир агара. Халкьличил бархбас бузахъуси хIяким сари ил. Бахъал сунечи дугьабизурти адамтала цалра мурад пикрилизи кахIесили яра кумекхIебариб ибси нушани аргъес хIедирехIе. Дявила хасси балбуцла бутIакьянчибас ва илдала хъалибаргунас Узлипат ГIусмановнани мекелли халаси кумек гIеббиахъули саби. Илис бикьрили бетарули саби ишди бурхIназиб У.ХIясановас «Суворовла орден»-на гвардияла 57 ибил мотострелковая бригадала шайзибад бедибси Баркаллала кагъар. Ила белкIи саби «ЛНР-ла, ДНР-ла, Запорожьела ва Херсонна областуназиб бетурхуси дявила хасси балбуцлизир бутIакьяндеш дирути Россиияла бургъантас кумек гIеббиахънилис».
БурахIелли, бургъантас дебали пайдалати маскировочные сетани дирнила хIяракатра бегI гьалаб гIеббуцибтала къяйлизир сари ил.
Гьачам редакциялизи гIяхIладли ракIибхIели, «БархIехъла замана, хIянчилизирад акьурухъунхIели, кумекбарес дигутира бучили, нуша маскировочные сетани дирес дашутира», — или буриб илини нушази. Газетала хIянчизарти нушара ил кирила хIянчилизи пай кабихьес хьулдухъунра. Хасси мерличи нушара дякьунра. Бархьли бурахIелли, ил гьамадси хIянчи ахIенри, амма селис илди сетани пайдаладирутил балухIели, халаси гъираличил нушани илди дерчурра. Узлипат ГIусмановнара илар нушачил рарх лерри. ГIяхIцад хIянчи барх нушани барира. КIинайс илини рурсби кьацIли бахун ва тамашаласи ихтилат дураберкIиб.
Гьачам редакциялизи вакIибси СВО-ла бутIакьянчизи нушани селис илди сетани итар хIяжаттив или хьарбаира. Саби бургъанти дигIянбиркуси мер-алав хъулри яра галгуби се-биалра лерли диалли, ила сетани дитIикIути сари. Дрон кабиркухIели, ила бархили, абзурли нуша лерси мерличи кахIейгур или викIи ил ургъан. Кумек бархьибхIели, илар маскировочные сетани лерли диалли, нуша дебали разидиркутира.
Ахирличиб бурес дигулра, Узлипат ГIусмановнагъунти адамти дарганти-ургаб бахъбикIаб. Илдигъунти хIянчизарти лебай, жамигIятла ва илаб хIербирути гIядатла адамтала аги къулайли бирар. ХIела гьамадси ахIенси бетуцлизиб хIед сабур, гьамаддеш ва гьарбизуни дулгулра, Узлипат ГIусмановна. ХIелагъунти хIял-тIабигIятла адамтани алавруцили, арали, разили, даршал дусла гIямру деркIаби.
ПатIимат Шахова
