ИшхIелла манзилла далайчибачи хIерикIухIели, дахъал пикруми алкIули дирар. Дила пикрили, илдазибад имцIатигъунти дахъал арцра харждарили, чедила куц жагабиранти саби. Илдани, дахъал операцияби дарахъили, чула дяхIла, куц-кабизла сипат дарсдирули сари. Амма наб бегIлара тамаша­билзуси — цали белчIунси далай цархIил далайчини тикрарбирухIели бирар. Гьайгьайрагу, лебилра далайчиби ца къяйлизи кабатес хIейрар. Леб илди-ургаб пагьмучебти ва мягIничерти далуйти дучIутира. Илдани гIядатли­биубливан, белгити автортала, яра чули делкIунти далуйти дучIули сари. Чедила куц-кабизра илдани дарсдирули ахIен, ЧевяхIсини чус бедибси жагадеш илдани мяхIкамли бихIули саби.

Буралли, гьалабла ва ишхIелла далуйтачи лехIяхъалли, илди-ургаб ванзалара заклара ургабсигъуна декIардеш леб.
ГьанбиркахъехIе хабарла СултIанат Кьурбанова, МяхIяммад Ула­хъаев, Пирдауз Камалова, Алпият Шапиева ва цархIилти. Ил­дала далуйтачи лехIирхъес иштяхIдулхъули бирар, сенахIенну дал­дикибти музыкаличил дарх, урхIмешуахIенти хIяб­кубтира дикьули дирар. Илдала далуйтани уркIи хIяй­ран­бирахъу, рухIлашалси паргъатдеш хьурабирахъу, бамс­ри чебар­ку.

Гьаннара лебгу илдигъунти далайчиби, амма дебали камли саби, ва цархIилти далайчибани, чулира хIяя арцлис дицибти гьалабетухъахъес балтули ахIен. ИшхIелла далайчибазиб цагьатIи вайси баркьуди хIисабба­ри­ра. Мисаллис, ца далайчини кIел поэтлизи сунела далайлис наз­мурти делкIахъес тиладибирули сай. Илис гIергъи илини кIел­ра поэтла назмурти гъудурдарили, илдазирад сунес ди­гутигъунти дугьби далцIи, ца поэтла ура кабатурли, далай бу­чIули сай. Ил бар­кьуди дебали лайикьагарси саби ва адамличи бал­бикибси ахIен. Иличиблира тIашхIебизурли, чус назмурти делкIунхIели, илдазирад чус гIяхIдизуртигъунти къябдарили, назмула мягIна букьбуи, чуласун далуйти дучIули сари. Се гIяламат бирусив ил?

Дила пикрили, жагали ва лайикьли бири далай бучIусини музыка ва гъай делкIунтала умира дурути диалри. Ну вирхулра, нушала далайчибани ил шайчибси аги барсбарес къайгъибирниличи…

МяхIяммадшапи Матаев