Се саби уркIила малхIямдеш? Ил адамла бегIлара гIяхI­си къиликъ саби, сабира нушала гIямрула лерилра шалубазиб дакIубулхъуси. Адамлизирти гIяхIти къи­ликъуни — уркIецIичевдеш, ряхIмучевдеш, ку­мек­­личи музаулхъни, къайгъначил алавуцни, хIеру­ди­бирни, жагали гъайикIни – илди лерилра мал­хIям­си уркIилизирад сари дигахъути.
УркIила малхIямдеш дибгIян-хъяшти секIултазиб да­кIубулхъуси саби. Нушани пикри бяхIчихIейули хьалли, цацахIели биштIаси гIяхIдешлира адамла уркIила гьав ахъбурцули бирар. Масала, гIяхIси девли яра разиси пишбяхънили. Иличирли нушара уркIичердирулра, вегIличи гьатIиралра бирхаудичертили детарулра. ПикридухъахIелли, сецадла дигесли бирара нушаб чили-биалра гIяхIси дев буралли, селис-биалра баркалла багьахъалли, уркIи кьакьадешли буцибси замана, ил ряхIятбирахъути дугьбала бакьахIелли. Илкьяйдали бирар цархIил адамлисра. ХIера, илдигъунти гIядатла секIултани саби разидешра бихуси. МалхIямси уркIили сай адам гIяхIти баркьудлуми дурадуркIахъес гьирирусира. БикIули бираргу «хъаба сели бицIалра, ил саби илизибад дурабулхъуси» или. ХIера, уркIи гIяхIси адамли, сунелара малхIямдешли, сай-алавси дунъя ванадешли ва шалали бирцIахъу.
УркIила малхIямдешли хъалибаргла бархбасуни дебадирахънилизи ва пергер аги-кьяйда кадилзахънилизи мекелли халаси пай кабирхьуси саби. БегIтани дурхI­ни дигиличил ва уркIила малхIямдешличил бяркъ­личи биркахъалли, илдира гIяхIти адамтили ха­ла­би­кIар.
ЖамигIятла бухIнабси агиличила гъайикIалли, гIяхI­­си, малхIямси уркIиличилси адамли къиянти ла­мус-хIяяличил ихъахъес, сархибдешуни дирахъес ва гIяхI­силичи бирхауди бетхIехъахъес кумекбируси са­би.
Илкьяйдали уркIила малхIямдешли алавси тIабигIят ва мицIираг дигахъесра бурсииру. УркIи малхIямси адам рухIлашал давлачевси сай, сена­хIенну ил хатIабачивад чевкархар, цархIилла уркIи иргъу, вегIличил ва алавси тIабигIятличил валги вирар.
УркIи малхIямси адамли гьар секIайзиб гIяхI­си­цун чебиу, гьарилличил уржибти бархбасуни кадилзахъа. ГIяхIти адамтачиб саби дунъяра тIашси, илдани саби жамигIятра гьа­ла­бяхI ба­шахъуси. Цаличил ца цадалги хIер­дирахIелли, нушала гIям­рура талихIчертили ва дав­ла­чеб­си бухIнабуцли ди­цIиб­тили де­тарар.

ПатIимат Мирзаева