Жамалудин Рабазанов «Кудагу» сель­советла бекI сай. Ил сунела къул­лукъуни гIяхIил дузахъуси багьадур­цунра ахIи, Кудагу ва Ирагъи шимала адамтала гIямрула яшавла шуртIри къулайдиахъес къайгъилизивси адамра сай.
2023 ибил дуслизив викIибсири Жамалудин ил къуллукъличи. Дагъиста дубуртала гьарилрара-сера шилизир къаршидиркути далагардешуначи вяхIягибсири итхIели ил. БегI гьалабси яргализир гьундури къулайси агиличи дикахъес хIяжатлири. Амма 2024 ибил дусла июньничив СВО-лизир бутIакьяндеш дарес багьандан вягIда къулбасбарили, Украинализи укьес кьасбариб Жамалудинни. Арадеш къулайли хIебиъни багьандан дявила анцIбукьуназир къуллукъбарес илис укьяхъес асухIебирниличила медициналашалти баянтанира ил уркIиагархIейахъуб. Лечениера барахъили, илини сагадан РФ-ла оборонала Министерстволичил дявила хасси балбуцлизир бутIакьяндеш дарес багьандан вягIда къулбасбариб. Илкьяйдали СВО-лизир бутIакьяндеш дарес арякьунсири ил.
СВО-лизир бутIакьяндеш дирухIелира сунела шантачила ва шиличила пикриикIусири Жамалудин. Кудагула ва Ирагъила шимазирти гьундури къулайси агиличи дуршнила масъулти арзести далилти гьунчидушес къайгъилизиври ургъан.
Дявила хъарбаркь таманбирухIели, Жамалудин кьяшлизи декIли вяхъибсири. ХIяйна бячунси лига балбикахъес багьандан чумал операция дарибхIели, ил дебали инжитиубсири.
Илдигъунти къияндешуначи хIерхIеили, Ж.Раба­за­нов кIелра шила жамигIятла гIямрула шуртIри къулайдирнилизи ахъиб. Шимазир къулайдешуни дирахънила шайчирти проектуни илини ункъли дяркъур ва ДР-ла Халкьла Собраниела депутатуначи ва шимазибти меценатуначи кумекбарахъес багьандан дугьаизур. Районна администрацияличил вягIдалавиубли, шимазир билхъаби дурадеркIес пикрибариб. СВО-ла бу­тIакьянчи сайливан, илис дедес хIяжатти лерилра арц Жамалудин Рабазановли Кудагулара Ирагъилара ши­мазир къулайдешуни ал­кIахъ­ни­лис харждариб. Ил­кьяй­дали кIелра шила жа­ми­гIят­лис кункдешуни ди­ахъес ва шими къулайси агиличи дикахъес дигулри илис.
Сунечил барх СВО-лизир бутIакьяндеш дирути бургъантани видеоличилси дугьабиз белкIунсири Жамалудин гIевуцахъес багьандан. Илдани балахъулри ил гIяхIгъабза сунела шиличила ва шантачила къайгъилизи викниличи нушани пахрубирулра или. Ил патриотла мисалли чебиахъули саби ахIерси ВатIайчи сегъунти диги лерал илала. Илини гапла гъайличил ахIен багалати баркьудлумани дурадуркIниличила балахъуси, ил гьарли-марти дубурланна баркьудлуми сунела санигIятличи, шиличи ва шантачи диги лерни балахъули саби или бурулри илала юлдашунани.
«Жамалудин Рабазанов РФ-ла «Гъабзадеш багьандан», ЛНР-ла «Гъабзадеш багьандан» ва «Игитдеш чедаахъни багьандан» ибти медальтала кавалер сайливан, ВатIайчи кахIедурхути диги лернила мисалли ветаурли сай. Арадеш нукьсанбикниличи хIерхIеили, ВатIайс къул­­лукъбарес кьасбариб илини. Ил цIакьти хIял-тIа­би­гIят­ла ва улкалис сай пайдаласили ветаэс дигнила лишан саби. ВяхъибхIелира ил уркIиагархIейуб. Къияндешунази гIелакайкибти аги-кьяйдализивра сунела шиличилара шантачилара къайгъилизи виркес даимиублири Жамалудин. Ил патриот сай ибти дацIти гъай ахIен, илала игитдешла баркьудлумачила бурути далилти сари. Илини ВатIайчирти диги иргъахъули сай сунела гIязиз жан кьурбандарес хIядурли виъниличил», — балахъули саби Жамалудин Рабазановличил барх калунтани.
Жамалудин Рабазановла илгъуна мисалли Дубуртар Улкала цархIилти халкьра уркIичеббирахъули саби ва иличи мешутили бетаэс къайгъилизи биркули саби. Сунени бируси гьарил баркьудиличи чекайзни, сунечилацун пикрихIейкIули, жамигIят гIеббуцес кьаслизи кайзни, сегъунти далагардешуни гьаладилзаллира, хIяжатси тяхIярли масъулти арзес имканти дургни илала хIурмат ахъбурцнила гьаликIунили детаурти сари.
Дахадаевла районна администрацияла пресс-служба