Ноябрьла 27-личиб Дагъистан Республикала БекI Сергей ГIялимович Меликовла дагъистанлантачил «бархьаначиси линия» бетерхур.
ДР-ла БекIли бурни хIясибли, балбуцла ахирличив ца суалличил сунечи виштIаси дурхIя малхIямли дугьаизурли уилри. НикIа дагъистанланни тиладибирулри ишдусалра ахъси даражаличиб Сагаси Дусла байрам дураберкIахъес. Илини Советский Союзла замана Сагаси Дусла байрумти секьяйда дурадуркIутирил бегIтазибад бакьили уилри.
Дагъиста БекI нушала республикала лебилра адамтази ил дурхIя гIевуцахъес дугьаизур. «Ца белгиси замана, — викIар Сергей ГIялимович, — Дагъиста адамти саби «сагаси дусла цIябдешлизи» гIелабушахъес кьабулбикили буилри. ИтхIели илди ёлкаби тIашдалтес, илдачи вавнала ва ухути чиргъмала духемти диршес, ёлка-алав делхъли булхъес ва далайбикIес урухкIулри. Нушала улкализиб илгъуна анцIбукь (гIилмуличи ва культураличи душмандеш) биахъес цугхIебиркур. Челябкьуси Сагаси Дусла байрам, биштIатас ахъси даражаличиб дураберкIили, нушани ил диубцад жагасили, шаласили ва талихIчебсили биахъес чебиркур».
Гьанбиркур набра ил замана. ИтхIели ну гьар бархIи Ак-Гёль шарала дубкад къунзикIусири. Гьаларти дусмазиб, декабрьла 10-15-ибти бурхIназибал тIашбатурли, бахъ жагаси ёлка биригу Ак-Гёль парклизиб. Сагаси дуслис гьалабси бегIлара гIергъиси баз ахирличи биркулри, амма нуни ёлка чебиули ахIенри. Нуван ёлкалигIиб умцIути цархIилтира лебри илаб. Гъамиубли илдазивадси цаличи, хьарикIулра: «Ишдус нушала парклизиб сен ёлка агарсив?» «Нуни хIебалас, дила узи, — викIар ил, — Чили сабил къадагъабарили саби, ёлкаби тIашдалтахъес».
«Сагаси Дуслис ёлкаби тIашдалтахъес нуша чили хIедалтутира?» — викIулра ну сагаси тянишлизи. Наб илини жаваб чархIебатур.
Гьанна бикайчи лебалри ил суал дила бекIлизиб. Халаси баркалла биаб ахирра ил суал гIячихъбарибси Сергей ГIялимовичлис. Се бируси нушаб ва нушала биштIатас ёлка агарси Сагаси Дус?!

ХIяжимурад Ражабов