Цалра инса цIакь ва пагьмула къел детахъахъес асухIебирар» Н.Крупская
Адамти лебти саби, чули бируси хIянчи уркIила жили чеббикIибти, санигIятличира мурхьти диги акIахъубли, узуси мерла кьимат ахъбуцес, илала хIурмат бакIахъес, санигIятра мурхьли бяркъурли, ил санигIятла дуклумачив бузерила ахъанайтачи абацIес, дуги-хIери цадарили, къиян-жапалис мукIурхIебакIили, иштяхI-гъираличил бузути.
Илдигъунтазивадли ца сай филологияла гIилмуртала кандидат, пагьмучевси поэт, публицист, журналист, фольклорист Юсупов Хизри ГIябдулмажидович. Ил Дахадаевла районна мегьла устнала бурибси Хъярбукла шилизив мегьла ва къаркъала устала хъалибарглизив 1956 ибил дусла августла 12-личив акIубси сай.
Дарганти-ургав цайли цаси 8 словарь цаладяхъибси, пагьмучевси лексикограф сайливан, Хизрила гIямруличила ва бузериличила бурес дигулра.
Хизрини 1974 ибил дуслизиб гIяхIти кьиматуначил Хъярбукла урга даражала школа таманбариб. ВатIайс къуллукъбарили гIергъи, Х.Юсуповли 1978-1983-ибти дусмазив ДГУ-ла филологияла факультетла Дагъиста отделение хъараахъур. СтудентхIелил Хизрила литератураличи диги акIуб, назмурти цаладирхъес вехIихьиб, шимази вашули, даргала халкьла мухIлила пагьму бучиб. «Нуша дучIахъути пагьмучебти преподавательти гьаннара хъумартес вирули ахIенра. Илдани нушаб мурхьси багьуди гиб, нушазир санигIятличи диги акIахъуб. Илди саби ГIябдуллагь ВяхIидов, МяхIяммадсягIид Мусаев, Басир ГIялибеков, Георгий Сивриди ва цархIилтира», —бурули сай илини.
1983-1986-ибти дусмазив Хизри ДейбукIла гехIел дусла школализив урус мезла ва дарган мезла учительли, 1986-1989-ибти дусмазив Урцакила 8 дусла школала директорли узиб.
1990-2004-ибти дусмазив ГТРК-ла даргала радиола корреспондентли, 2004-2007-ибти дусмазив «Гьалмагъдеш» журналла редакторли узули калунсири. 2006-ибил дуслизиб Х.Юсуповли «Даргала гIядатунала поэзия: цаси ва мер-мерличи хасси» тема хIясибли диссертация бетерхахъур. Илгъуна гIилмула хIянчи академик ХIяжи ХIямзатовли ахъли кьиматлабарибсири.
Хизри Юсупов гьарра шайчивад чеветаибси лексиколог сай. Илини, Россиялизирцунра ахIи, СНГ-лизир детурхути конференциябачир, симпозиумтачив докладличил гъайулхъули, чуйнара бутIакьяндеш дариб.
Бузерили сай адам жагаируси или бикIули бирар. 2020-ибил дусличивад вехIихьили, Хизри ГIябдулмажидович РАН-на Дагъиста хIялумцIлабала центрлизив лексикологияла ва лексикографияла отделла заведующийли узули сай. Ил манзилла духIнар Хизрини 175 хIянчи делкIи сай, илдазирадли — 30 жуз.
ХIурматла газета бучIанти, хIушаб Хизрини цаладяхъибти словарьтала сияхI гьалабирхьулра: «Русско-даргинский словарь» (Илизир 47 000 дев ва фразеологизмаби лер), «Урус мезла – дарган мезла школала словарь» (7200 дев ва фразеологизмаби), «Литературоведениела терминтала словарь» (700 термин), «Дарган мезла словарь», «Юсупов, Курбанов. Орфографический словарь даргинского языка», «Русско-даргинский словарь», «Дарган мезла синонимтала словарь» (12500 синоним ва синонимтала 300 къяй), «Русско-даргинский словарь».
Бурес чебиркур, словарь цалабяхъни дебали къиянси, халаси яхI, сабур ва кьасчебдеш тIалабдируси хIянчи саби, сенкIун гьарил дев, дурусли, грамматикала кьяйдуртачи балбикахъили, шурбатес гIягIниси саби.
Ца адамли 7200 девлизибад ва фразеологизмабазибад цалабяхъибси словарь дураэс гьамадсира ахIен, сенкIун илис, лексикографияцунра ахIи, филологияла гIилмула цархIилти бутIнира далес чараагарси саби. Словарьти цаладяхъес багьандан, Хизри дуги-хIери цадарили, чекайзурли узусири. БикIуливан, хIянчи дигуси гъабзали къаркъубира гъайдикIахъу.
Х.Юсуповли, литературный мез мяхIкамдарес багьандан, барибси хIянчи чихъли кьиматлабарили, ишдуслизиб илис «ДР-ла гIилмуртала урибси хIянчизар» ибси хIурматла у бедиб. Ил илкьяйда цархIилти грамотабачил ва медальтачил шабагъатлаварибси сай.
Адамлизиб бегIлара гIяхIси — илини жамигIятлис ва ВатIайс гIяхIдеш лебхни. ХIера, илгъуна сай иш белкIла игит Хизри ГIябдулмажидовичра.
МяхIяммад Тахсурманов
