Ишди бурхIназив цагьатIи дагъистанлан Россияла Игитла чихъси уличи лайикьикиб. Иличил бархбасахъи, сунела Телеграм-каналлизиб ДР-ла БекI Сергей Меликовли бурули саби:
«Нушала цаванзалан, Дербентла районнизивадси Ярамир Темирханов Россияла Игит ветаур! Илис Мургьила Зубари ЧевяхIси Главнокомандующий Владимир Владимирович Путинни бедиб.
СВО бехIбихьибхIейчивад гьанна 18-эсил дагъистанлан ил чихъси уличи лайикьикили сай. Ил шабагъатла къакъла гIелар – дявила хъарбаркьуни, дерцахъибти гIямру, хъялис мардеш.
Жагьли виъниличи хIерхIеили, Ярамирли Россияла Ярагъладарибти ЦIакьанала цалабяхълис – гвардияла мотострелковая 6-ибил декIарси бригадалис буйрухъуни дедлугули сари. Буйрухъуни дедлугулицунра ахIенну, лебилра-декIар устадешчебти командиртанира пахрубарес хIейэсти сархибдешуни чедиахъули сари. Набзи илала гьунартачила гьачамцун ахIенри бурибси: секьяйдали илала подразделениели камти детахълумачил душма хьулчилидиубти мерани дуцибал, севан Северск азадбалтахънилизир бутIакьяндеш дарибал, сен-сен бегIлара къиянти масъулти гьунчидиркахъибал. Ярамирли мурталра гьарли-марси мурул адам, бирхауди виэси дявила юлдаш ва секIал ункъли балуси командир сайливан, чебаахъиб. Иличил дарх дявила къуллукъуни тамандирути илала гъабзадешли ва рухIла дебадешли тамашабирахъули саби.
Дагъистанланна дявила гьуни гIяхIцад шабагъатуначил кьиматлабирули саби – Гъабзадешла хIябалра орденничил, ДНР-ла Игитла уличил. Илала гьарли-марти устадешличила бурули саби илис заманалис гьалаб, авал дус гьалаб, полковникла у беднилира. Ярамирла асилси бузери нушала Президентлира чихъли кьиматлабариб – дагъистанланничи зянкъдяхъили, дявила къуллукъуни жавабкардешличил дихнилис баркалла багьахъур. Мурталраван, пачалихъла БекIли солдатуни ва офицерти хIерудиличил алавбуцили биъни сагадан чебаахъиб.
Нушала чевяхIси Расул ХIямзатовли белкIунсири: «Дергъли ванзаличибти игитуни имцIабирахъути саби». Дагъистанлантанира СВО бехIбихьибти цаибти бурхIназирал илди дугьби баркьудиличил мардирули сари – дявила гьаларти къяяназиб, хIярхIубала цIа чекьурхIели, асилдешличила, хIурматличила ва нушаб дурхъати гIядатуначила хъумуртули ахIен. Вирхулра, нушала игитла хIял-тIабигIятличи асарбариб бургар ил бузерила зяхIматчибала бахъал дурхIначилси хъалибарглизив халаваънира: дудеш водительли узусири, неш – кьалтинти дируси фабрикализир.
Ярамир, ахIерси, илгъуна чихъси уличил уркIи-уркIилавад мубараквирулри! Баркалла хIела бегIтас – Буйнатали Мисрихановичлис ва Мафият Исиновнас – гьарли-марси Кавказла бяркъ гибнилис, суненира хIу урехиагарси, гъабзадешчевси, нушала цаси – миллатчибачибад Чедибдеш сархнила – мурад бетерхахъес ахирличи бикайчи укьес хIядурсили ветаахънилис. Пахрубирулра!»
