Адам анцIкьи-шишимлизи викибхIели, далайли илди хIялани черардукес, уркIи разибарес кумекбирули бирар. БикIули бираргу, жагали зайбикIуси, пергер далайли зягIипсира аравирахъу или.

Илгъуна гьайбатси тIамала вегI сай Камалутдин МяхIяммадшапиевра. Совет хIукуматла замана ил нушала улкала халатигъунти лерилрара-сера шагьуртази ваили, илар сунела пагьмуртачил адамти разибирутири. Дурала улкназира ваиб ил, нушала Дагъистайчи ва дагъистанлантачи хастицун макьамтачил илабти адамтира тянишбирули.

ДАССР-ла урибси гIяртист, ДР-ла халкьла гIяртист МяхIяммадшапиев Камалутдин ГIямарович акIубси сай 1945 ибил дуслизив Къарабудагъкентла районна Губданила шилизив.

Илини 1970 ибил дуслизиб Сергокъалала педагогикала училище таманбариб.

Узули калун ил урга даражала школализив музыкала дурсри кадирхьули ва Къарабудагъкентла районна культурала Юртлизив художественный руководительли.

1976 ибил дусличивад 2004-ибил дусличи бикайчи ил «Дагъистан» ГТРК-ла хорла солистли вирусири. 1996 ибил дусличивад ил Дагъиста пачалихъла операла ва балетла театрла хорла гIяртистлира калун. Дагъиста, илдала лугIилизир — даргалара, поэтунала назмуртачир акIахъубти гIяхIцад далуйтала автор сай. Илди суненира жагали зайдикIахъули дучIути сари. Сунела творчествола гьуни ихъуцад, илала далуйтала хазнара давлачеббикIусири. Илкьяйдали илала Дагъиста радиола фондлизир 400-личирра имцIали далай лер. Илала далай халаси рухIласи давла саби, сабира адамли цалабяхъибси ва халкьлис халаси савгъат саби.

Илала далуйтала тамашала макьамтазир, далуйтазирти дугьбазир дяхIимцIайзирван жагали чедиули сари халкьла гIямрула лерилра шалуби. ХIера, ил сабигу пагьмучевси гIяртистла, далайчила, композиторла творчествола сихIрула цIакьра: лебси хIял-хIякьикьат хъатлаб гьаргбарни ва чебаахъни.

Даргазивцунра ахIи, арагIевли Дагъистайзивра, улкализивра вархли машгьуриубси далайчис, юбилейличил мубараквирули, къаркъаван чIумаси арадеш, хъулиб баракат, талихI ва разидеш дулгулра!

Салимат ХIяжиева,
Р.ХIямзатовла уличилси Миллатла библиотекала хIянчизар