Разидешра бихули хьалли, адамтала гIямрулисра урехилатили урдухъес асубирар янила замана, хаслира – Сагаси Дусла байрамла дуги, къяйкдирути гIягIниахълуми.
БиштIатас илди гIягIниахълуми (пиротехника) дебали дигахъути сари. Байрамла гьав ахъбуцес багьандан, дурхIнас илди ахIи, гIур селра гIягIнисира хIебургар или гьанбиркули бирар. Амма дахъалгъунти анцIбукьуназир илди пайдаладирнила тяхIяр-кьяйда лайикьси даражаличир хIедузахъни багьандан саби гIямрулис урехира алкIуси. Чум анцIбукь диуба пIянкьдулхъути гIягIниахълумани биштIатала тIулби, някъби, дяхI-някъ зараллизи дикахъибти? ХIебиалли, нушаб гьаннал дехIдихьес хIяжатли саби ил шайчиб иргъахънила хIянчи дурабуркIули.
Авараагарли лайкадакIибти мераначир ва хIяжатти кагъурти агарли, пиротехника хIейсули, кадизахъурти низам-кьяйда дузахъути, хасти тукентазир сари илди исути. ИлхIелира дурхIнази илди пайдаладирнила лерилра бетуцуначила баянбарес чебиркур. ДурхIнази илди хIязла матяхIван ахIи, сари гIягIниси тяхIярли пайдалахIедарнили, чула ва алавтала арадешлис урехи алкIахъути гIягIниахълуми диъниличила аргъахъес гIягIнили саби. Къайгъибарая биштIатази илди мякьлаб халати агарли пайдалахIедирахъесра.
Сагаси Дусла байрамлис гьалар бегIтани исули дирар декIар-декIарти журала пиротехника, биштIатас байрам жагабарес, разисили бетаахъес ибси пикриличил. Амма илдазибад бахъалгъунти пикрибулхъули ахIен хасти гIягIниахълумани, илди гIягIниси тяхIярли пайдалахIедиралли, арадешлис ва гIямрулис урехи акIахъес асубирниличила. Ил багьандан дигахъаси бегI гьалабси яргализиб саби бегIтани ил шайчир жавабкардеш дихули, гIур биалли – биштIатазира ил масъалала чебкад баянбирули, пиротехника дузахънилизир чедихIяртдеш дакIу­хIедирахъес маслигIятбирули.
Кадизахъурти тяхIяр-кьяйда пикрилизи касили, халатала чебетаибси хIе­рудилиур алкахъунти фей­ер­веркунаницун саби биштIатас шаддеш бихусира. Иличила сеналра хъуммартидая!

Салимат ГIялиева