Гьалабван «Ахъушала район» МО-ла багьахънибала ва СМИ-бачил бархбас бузахъуси управлениела начальник Башир Ибрагьимовли районна газетала редакциялизи СВО-ла бутIакьянчиби киб, сабира ХIямшимала шилизибадти.
Авал узикьарли цазаманализир дявила балбуцлизир бутIакьяндеш дирулину, ишди кIиличил ихтилатбарили, авалра гIяхIгъабзачила белкIес хъуммартидая! — иб Баширли.

Илдачил варх леври гьалав районна соцзащитала управлениелизив узули калунси, бусягIятла замана СВО-лизи сай гIяхIъулали арякьунси Зайпадин Зай­па­диновра. «Набчила белкIес гьачамлис жявли сабину, ишди ну­шала бархкьябачила, илдала чIумадешличила ва дя­вила майдайчир чедиахъути гъабзадешличила бел­­кIес гIягI­ни­биркур!» — или Зайпадин кабинетлизивад дуравхъун.

Редакцияла хIурматла гIяхIлазивад цалис би­кIул­ри КьицIалмяхIяммадов ГIябдуллагь ХIя­сай­ни­кьа­диевич, кIиэсиллис —МяхIяммадов ГIяб­дусалам Мя­­хIям­мадович. ВягIда къулбасбарили, ГIябдуллагь 18 дус­цадхIи сунечи чедуркъубти анцIбукьуназир бу­тIакьян­деш дирули увухъун. Ил 2022 ибил дуслизиб дявила хасси балбуц бехIбихьибхIейчивад къяббердниагарли Украинала мер-мусаличив сай. Урга-ургади хъули отпускличи урхьули виъниличилара гьанбушили, гьанна бусягIятра кIелра узикьар отпускличи дархьибтира, хъалибаргуни шагьарлизир диалра, шилизи бегIтира, гъамтира, шантира чебаэс дакIибтира или буриб.

ГIябдусаламли чумал халати дявила анцIбукь кадикибти мераначив къаршиикниличилара гьанбушили, чула узбикьуртачила баянти дуриб: КьицIал­мя­хIям­­мадов Ражаб КьицIалмяхIяммадович — прапорщик, КьицIалмяхIяммадов ХIясбулла Исрапилович — сер­жант, Буйнакъсклизив, РФ-ла оборонала Ми­нис­терствола подразделениелизив вирусири, СВО бехI­­бихьибхIейчивад илаб бургъули саби или. Гьарилла шабагъатуни, медальти, Баркаллала кагъурти лерни­личилара гьанбушиб. ГIябдуллагь лайикьвикили сай Гъаб­задешла орденничи ва дахъал медальтачи.

Орден се багьандан бедибсил бурахъес тила­ди­ба­­рибхIели, ГIябдуллагьли ил дявила авлахъличибад бяхъибти дурайсухIели, ва илдала лугIилизив командирра верцахъибхIели бедниличила аргъахъиб. 6499 ибил дявила частьлизив старший прапорщик ГIяб­дул­лагь КьицIалмяхIяммадовла лебли уббухъун кIел биштIати, ОМОН-на прапорщик МяхIяммадов ГIяб­дусалам МяхIяммадовичла — хIябал дурхIя.

…ХIеррикIулра илди гIяхIгъабза адамтачи ва чебиусиван билзули саби илдала нешани, рузби, уршби-рурсби, гIямрула бархкьяби… Наб илди гIяхIгъубзнази дахъал секIал хьардаэс дигулригу, хIяйранкариубли, гъайличи рархьрилзули ахIенри.

Гьандикиб Даниил Бессоновли сунела передачализир дурибти пикруми: «Гьарли-марли детарути анцIбукьуни дявила майдайчир чехIедаили гIергъи, телевизорлизирад чедиахъутани илабси аги аргъахъес мажахIят дирули диэс! ЧебяхIси ВатIа дургъбалайчир гIяхIцадла къиянти, урехилати ва ламартла сари ишхIелла дявила тяхIяр-кьяйда: мурт-дигара, сецад-дигара, чинар-дигара арцес дирули сари дронти ва беспилотникуни, илдази зарал хIебарахъес багьандан дебали сахътили, чIуматили, бурсидеш касибтили биэс гIягIнили саби нушала бургъанти!»

ПикририкIулра: «ХIера, бахъхIиагарли яни чесабиур, сагадан миъбяргIибси авлахъличиб бургъес чевкъуси вара ГIябдуллагьлисра, ГIябдусаламлисра, азирти нушала цархIилти гIяхIгъубзнасра!» Илгъуна пикри гьарахъбарес дигули, бургъантазирад телефонтала номерти сасира: «Чедибдеш!» ибси дев аргъибхIели, кIиличилра зянкъдяхъили, мубаракбарес!

СВО-ла бутIакьянчибас багъиш­ладирулра ишди назмула тугъи:

ХIушала гъабзадешлис
Умцла чинаб бургуси,
Гьунарла чебяхIдешлис
Кьимат севан лугусив?

Адамдешла даража
Бурес пикри биусив?
ВатIайс мардеш аргъа­хъес
Пагьра баари лебсив?

УркIили кьасбарили,
ЧеббикIили ил гьуни,
Къиянти дяхIярули
Чебуркъубси чейсули.

БуцIардеш ва бугIярдеш —
Дуэс авара аргъла,
Душмантала гьими-кьяс —
Думкьахъути аргъала.

Се-дигара лер хIушаб
Чевкъути гьарил бархIи,
Паргъатли беркIес лебу,
Марлира, цалра дуги!

ХIуша уркIичердарес
Дугьби даргес вирусив,
ЧеряхIти баркьудлуми
Се гъайли иргъахъутив?

ХIушаб цIакьси баркалла
Абикахъес вирусив,
Халкьлис хIушала ламус
Ахъес имканбикIусив.

УркIбазибси чIумадеш
Севан сипатбирусив,
ХIушаб бархьси кьимат гес
Дугьби даргес вирусив!

Писки виалри — дурги
Нуни хIедургулрагу,
ГIяли-АсхIяб, се ишал
ХIунилра гIеббурагу.

СВО-ла гIяхIгъубзнас
Дурести дахъал лергу,
Чула гъабзадеш дурес
Гъай дархьхIедилзулигу.

ХIеррикIули хIушачи —
Чебиулра нешани,
ГIямрула гьалмагъуни,
ХIушала уршби-рурсби.

Сецад бухъянни вара
Замана чули буркIул!
ХIерли бургаргу бакьес
Хабар — уркIи шадбирул:

Чесабаиб чедибдеш,
«Таманкадиуб дявти,
Гьунидаэс гIяхIгъубзнас
ХIядурдиира, шанти!»

Харидешла ил бархIи
Сабаахъагу, Аллагь,
ХIела уркIецIиличи
ХIерлира, иншааллагь!

ПатIимат Маллаева