НурмяхIяммадова ПатIимат Рабадановна акIуб­си сари Бутрила шилизир. Бутрила шилизибси шко­ла таманбарили, ил Буйнакъск шагьарлизибси педу­чи­лищелизи карерхур. ХIунтIена дипломличил пе­дучилище таманбарибхIели, ПатIимат Дагъиста па­чалихъла пединститутлизи карерхур.

Пединститут таманбарибхIели ил Ахъушала ши­­ли­зибси Семгамахьила школализи рузахъес рархьиб­си­ри. Илар урус мезла ва литературала дурс­ри ка­дир­­хьули рузусири. 1982 ибил дуслизир ТIе­бек­махьилизибси шко­ла­лизир рузес рехI­рихьибсири ва 1994 ибил дусличи би­кайчи илар рузусири. ПатIи­мат Бутрила шила ад­министрацияла бекIла замес­ти­тель­ли рузули сари.
Чинар рузули кали риалра, илини хIянчи баркал­лаличил бирусири.
ПатIиматли сари рузути коллективтазиб ва Бут­рила шилизиб халаси хIурмат сархиб.
ГIямрула вархкья ДинмяхIяммадличил кIел урши абикьур, илдас гIяхIси бяркъ бедиб, чебяхIси даражала багьуди касахъиб, хъайчикабатур. ДинмяхIяммад че­бяхIси даражала багьуди касили, дахъал дусмазив учительли узули калун. ТIебекмахьила школализир илини историяла дурсри кадирхьули калунсири.
ПатIимат «Ахъушала район» МО-ла шайзирад чу­мал ХIурматла Грамоталичи лайикьрикиб, 2012 ибил дус­лизир халкьла перепись бирухIели ва 2006-ибил дуслизиб шила хозяйствола перепись бирухIелира илини халаси хIянчи барни багьандан пачалихъла ста­тис­тикала Федеральный кабизла шайзирад медаль­тачил шабагъатларарибси сари.
— ПатIимат дебали гIяхIси, малхIямси, дяхI шаласи адам сари, — рикIи районна газетала бекI редактор Па­тIимат Маллаева.
Чинар рузалра ПатIиматлис халкь мурталра баркалла бикIули саби. Ил сецад-дигара гапличи лайикьси сари.

С.ГIябдуллаева