Гьаларван ца балгунси хъалибаргличил тянишриубра. Илдала гIямруличила, бузериличила газета бучIантасра къантIти баянти гьаладирхьулра.
ХIясангIялиев ХIяжи ГIялиевич 1931 ибил дуслизив ХIурхъила шилизив акIубси сай. Ил Зооветтехникум белчIи гIергъи, Германиялизиб къуллукъбирули хIябал дус байхъала калун. 1960 ибил дусличивад вехIихьили Кьаранайла шилизив хIяйвантала тухтурли 9 дус узиб. ХIяжи ГIялиевичли сунела бузери Сергокъалала шила колхозла хIяйвантала тухтурли узули даимбариб.
Сельхоз институтла зоотехнический отделениера заочно белчIун. Фабрикализив бригадирли, гIур бекIливиубси зоотехникли узули калун. 1977 ибил дусличивад вехIихьили Кьадиркентлизибси хIяйвантала фермала заведующийли узули, 20 дус хIянчи дариб. ХIяжи ХIясангIялиев узуси замана ил ферма дебали гьалабяхI арбякьун, хIянчизарти уркIичебли, саберхурли бузи, кьулани дахъал ниъ луги. Ферма гьаркьятала къяйлизи дураиб. ХIяжи ГIялиевич, сунела хIянчиличи чекайзурси, бархтачил валгунси, хIялалли узуси баракатла адам сайхIели сарри фермализир илдигъунти сархибдешунира дирути. ХIяжи ГIялиевичла бузерилис баркалла балахъули дедибти дахъал Баркаллала кагъурти, медальти ва шабагъатуни лер.
Пенсияличи ваибхIели, сунела мирхъилис къуллукъ имцIабариб. ХIяжила мирхъила умуси, бизиси варъа чумра адамлис дарманбиубли, илди излумазибад сагъбариб.
ХIясангIялиева Рукьият ГIябдуллаевна акIубси сари ГIяймаумахьилизир. Педучилище таманбарили гIергъи, ил Къаякентла районна Гергала шилизир мугIяллимли рузули калун. Итди дусмазиб республикала «Ленинна байрахъ» газетализи иличила очеркра белкIунсири. 1963 ибил дуслизиб ХIяжинира Рукьиятлира кьисмат цабариб, муруйчил рарх, ил узути шимази сарира рашусири. Чина рукьялра, Рукьият сунела санигIят хIясибли рузусири. Илкьяйда, Ногъайла районнизир бехIбихьудла классунала мугIяллимли, Сергокъалала цаибил дурхIнала анхълизир, Кьадиркентлизир яслила заведующаяли рузиб. Кьадиркентла школализир учительницали ва старшая вожатаялира рузули калун. Районна гьар балбуцличи школала бучIанти ункъли хIядурбирули, абзаначир гьаларти мерани дурцули, районна администрацияла Баркаллала кагъуртачи Рукьият чуйнара лайикьрикиб. Пагьмучерси педагог алапаличи хIерхIеили, сунела санигIятличи дигиличил, халаси иштяхIличил 70 дус риайчи рузусири. «Арц хIейалра, хIянчи диалли диур ишис» — бикIутири бархти Рукьият ГIябдуллаевнас.
Бузерилизиб саберхурти ХIяжи ва Рукьият ХIясангIялиевхъала гIибратла хъалибарглизиб шел рурси леб. БегIтани рурсби гIяхIти багьудлумачил бегIбариб. Илдира неш-дудешличибад гIибрат касили бузули саби: Разият – финансовый отделла бухгалтер; Барият – къалабаси кумекла (скорая помощьла) хIянчизар; Раисат – хIулбала тухтур; Рашидат — Москвализир сари, сунела рурсби багьудлуми чедицIахъес арбукили аррякьи; Насибатли – нешла гьуни даимбирули, Кьадиркентла школализир учительницали рузули сари. Духути, ва багьудичебти рурсбани бегIтас гIяхIси къуллукъра гIеббиахъули саби.
Илди гьанна 62 дус барх хIеркабирули саби. ХIяжила ва Рукьиятла рурсбачибад акIубли 16 урши-рурсира, 21— илдала биштIатира леб.
Октябрьла 5 – мугIяллимтала БархIи сабливан кабизахъурси саби. Иличил бархбасахъи гIяхIцад дусмазир педагогли рузули дахъал хIянчи дарибси, сунени бучIахъутала, барх бузутала халал хIурмат сархибси мугIяллим, зубартиван ухути шел рурсилис бяркъра, багьудира дедибси неш– Рукьият ГIябдуллаевна мубаракрарес дигулра.
ГIяхIлас гIяхIялдеш дарес мурталра хIядурти, сахаватти, халкьличи дигичебти ХIяжисра Рукьиятлисра, чула берхъибси анхъгъуна хъалибарглисра дахъал гьарбизуни, бузерилизир сархибдешуни, арати, талихIчерти, духъянти гIямру дулгулра.
ГIяхIти гIяхIялдеш дарес
ГIяхIлачи даим хIерти,
Адамла мурад барес
Мурталра къалабати.
Мирхъиван садерхурли
Дахъал хIянчи дарибти,
Гьар вакIибси варъали
ХIевахи вархьхIейути.
ХIялал бузериличил
Халал хIурмат сархибти,
ЯхIличил ва кьасличил
ХIедамсурли дузути.
ХIяжира, Рукьиятра
Диаба даим шадли,
Дарх духъяна гIямрура
Габну хIушаб Аллагьли.
ГIямру шаладирахъес
Алкада шел зубари,
ТалихIчебли хIербараб
Саби Кьудратла ВегIли.
ХIяжи-адала гумай
ГIуррара халабикIаб,
Илар гIяхIла хабурти
Гьар бархIи имцIадикIаб.
