ДР-ла «Мер­ли­чир­ти сиптаби» прог­рамма дура­бур­кIули, Да­хадаевла районна Кьун­кьила шилизиб шинна провод лушнила хIянчи детурхули сари.

Бурес гIягIнибиркур, «Мерличирти сиптаби» программа мерличиб чус чули гьуни чебиахъути органтала ихтиюртачил дархдасунти масъулти гьунчидуршниличи бяхIчиаибси саби. Баягъи проект хIясибли шила мер-муса, культурала, бекIахъудила хозяйствола, шанти шинничил гIеббурцути объектуни, машинала гьундури сагали делшес яра къулайдарес вируси сай.

Кьункьила шантала шин кадукес ибси пик­ри администрациялира гIеббуциб ва «Шинна провод кабирхьнила хIекьлизибси» хIук­му бариб. Шила бекI Халикь Рабадановла гъай хIясибли, шилизир лерилрара-сера сип­та­би дурадуркIути сари Кьункьибадти Да­ха­даев­ла районна собраниела депутатуни Ну­рул­лагь Кьурбановлара, СалихI СалихIовлара кумекличил.

«Иш нушала цахIнабси проект саби. Ил гIямрулизиб бетурхахънилизи шантани халаси пай кабихьиб, районна администрациялира гIердуцира. ХIянчи ахирличи дикибхIели, шинна къиянси масъала тамай бекIбирниличи вирхулра», — баянбариб Х.Рабадановли.
Проектла тIалабуни хIясибли, республикала бюд­­­жетлизирад декIардирути арцла 2 про­цент­ла кьадарличир имцIали «Кьункьила ши» му­­ни­­­ципальный цалабяхълира кадирхьути сари. Ил­кьяйда проектла тIалаб хIясибли, 15 про­цент­ли_чир камли хIедиахъубли ме­це­на­ту­на­нира, шила шан­танира арц лугути сари.

Иличил бархбасахъи, проект гIямрулизиб бетерхахъес чучи чесибти гьабкьябала кьукья лебтачилра Кьункьила шилизиб шинна провод барахъес кумек гIеб­баахъес ибси тиладиличил дугьабилзули саби.

Ишаб гьанбушес гIягIнибиркур, гьанналис шантани чула харжаначил ва цIакьаначил 2,1 километрла бухъяндешличилси турба ва 15 тоннала чарма кадихьили сари.

Эгер чедиб гьанбушибси проект ДР-ла эко­номикала ва мер-муса гьаладяхI да­шахъ­нила шайчибси Министерствола конкурсличиб бетерхалли, Кьункьила шилизиб шинна провод бирар ва шантала гIямрула шуртIри ункъдирар.
Ил проект гIямрулизиб бетерхахъни шила шантас дебали мягIничебси анцIбукь саби.

Кьункьила мурул адамти хIянчилизибад урух­хIекIути, илди далути, цалис ца ку­мек­барес гьалакти ва цабалгунти гьарли-марти гъубзни биъни чебаэсли саби. ГIер­гъити 5-6 дусла духIнар илдани шилизир да­рибти жагадешуни илис бикьрили детарули сари. Шила ад­министрацияла сипта хIясибли дурадуркIути лерилрара-сера билхъабазир жигарла бу­тIа­кьяндеш дирули сари ГIяшургIяли Кьур­бановли, ГIялиших МяхIяммадовли, Абакар Ра­ба­дановли ва бахъал цархIилтанира. Илкьяйда гьан­хIебушес хIейрар чула отпускла бурхIни акьули кахIебирути СВО-ла бутIакьянчибира ХIя­бибуллагь ГIялиев, Камил Рабаданов ва цархIилтира. Бурасли, гьаларван детерхурти сентябрьла выбортачиб илди кIелра шила собраниела депутатунили бикIибтири.

Илала дурабадра, гьалабван Кьункьир ЧебяхIси Чедибдеш 85 дус биъ­ни­ли­­чил бархбасахъи, тIашбатурси сагаси Че­диб­­­дешла анхъ ва памятник районна бекI Мя­хIям­мад ГIябдулкьадировла бу­­­­тIа­кьян­деш­личил абхьибтири. ЦIудара рангла мар­мар къар­къа­лизибад барибси халаси памят­ник­ли­чир Кьункьибадти Че­бяхI­си ВатIа дергъла бу­­­тIа­­кьян­чибала уми ца шайчир ва СВО-ла бу­тIа­кьян­чибала — итил шайчир гьаладихьили сари.

ПатIимат Казимова