ГIяли МагьдиисмягIилов 1946 ибил дусла декабрьла 1-личив Дахадаевла районна Кьункьила шилизив акIубси сай. Халаси хъалибарглизив халаваибси илини дахъал къияндешуни чедаибтири. Иличи хIерхIеили, ГIяли МагьдиисмягIилович чIумаси хасиятла ва цIакьти хIял-тIабигIятла вегI жагьил ветаур.
Педагог ветаэс хIядурикIуси ГIялила неш-дудеш шила колхозлизиб бузутири. Баягъи илдани сайри урши къияндешуначи ва барибси-бурибсилис жавабкардеш дихахъес бурсиварибси. Баягъи, илди къиликъунани ил бузерилизив гьалавяхI вашахъулри.
Багьудлумачи гъаргъси, гьарил секIал багьес дигуси ГIялини, унра шилизи вашули, 10 классла школа таманбарибсири.
Сунела безерила гьуни жагьси педагогли 1963 ибил дуслизиб Санахъарила шилизиб бехIкабихьибсири. Багьудлумачи гъаргъси ил 1964 ибил дуслизив Дагъиста пачалихъла университетлизи керхур. УчIес илис бекIлил къиянбулхъули ахIенри.
ЧебяхIси даражала багьудлумачил вегIиубси ГIяли МагьдиисмягIилов 1970 ибил дуслизив гIярмиялизи арякьунсири. Илар чекасибти къияндешунани нушала белкIла игитла хIял-тIабигIят гьатIира чIумадиахъуб, ва илини ВатIайс ва халкьлис къуллукъбарнила мягIничебдеш аргъиб.
ГIярмиялизивад чарухъи гIергъи ГIяли МагьдиисмягIиловичли районна декIар-декIарти школабазиб мугIяллимла бузери даимбариб.
1972 ибил дусличивад 1975 ибил дусличи бикайчи районна багьудлуми тIинтIдирнила шайчивси инспекторли узули калун.
1975 ибил дусличивад 2003-ибил дусличи бикайчи ил Кьункьила урга даражала школализив математикала учительли узули калун, чеалкIуси наслу багьудлумачил ва бяркъличил бегIбирахъули. БучIантас ил дигахъи.
2003-ибил дуслизив МагьдиисмягIилов ГIяли МагьдиисмягIилович школала директорла заместительла къуллукъуни дузахъес вехIихьиб ва сунела бажардичебси бузериличил школализиб дурхIнас багьудлуми дедлугнила даража гьатIира ункъбиахъуб.
Илала бекIдешлиур Кьункьила школала дурхIнани республикала кьадрила олимпиадабачирра дархли гьаларти мерани сархулри.
ВиштIахIейчивад ГIяли МагьдиисмягIилович спортлизира ахъибсири. Чуйнара-сера шабагъатунира сархибтири.
Илини жигарла бутIакьяндеш дирулри Дахадаевла районнизир дурадуркIути жура-журала далдуцуназир.
Пенсияличи арукьес гьалав илини жагьти педагогуни, гьарил секIал гIеббурули, бузахъес бурсибариб. Баягъи илини дурсрачир дузахъути тяхIурти гьаннара цацабехIти мугIяллимтани пайдаладирули сари. Ил багьандан ил бахълис пасихIкар насихIятчилира ветаурсири.
Ишдусла август базлизив, хIейгеси биалра, вахъхIи зягIипли калунси ГIяли МагьдиисмягIилов гIямрулизивад шалгIевухъун.
ГIяли МагьдиисмягIилович нушала, илини бучIахъути шантала, барх бузули калунтала уркIбазив даимлис мицIирли кавлан.
Марина ГIяхIмадова, Мурад Алжанбеков
