Бара гьалабван Хайдакьла районна «Кайтаги» бикIуси гIядатласи культурала Центрлизир районнизирадси поэтесса Гулжанат Нажмутдинова бучIантачил гьунираиб. Илаб поэтессала «УркIили хъумхIерту» бикIуси назмуртала сагаси жузличил бучIанти тянишбиуб. Балбуцлизир бутIакьяндеш дариб ва Гулжанат мубаракрариб Мажалисла шилизибси школа-интернатла бучIантани, поэтессала тухумтани, бархкьябани ва илала пагьму дигантани.
Балбуц ибхьули гъайрухъунси Центрла директор Зубайдат ХIясановани Г.Нажмутдинова, гIямрулизиб кабикибси мягIничебси анцIбукьличил, мубаракрариб. Илини буриливан, поэтесса «Хайдакьла урунжуни» бикIуси литературала цахIнабикла вакилра сари.
Гулжанат Нажмутдинова ДР-ла культурала хIурматла хIянчизар сари. ДГУ-лизиб белчIуди хъараахъурли гIергъи, илини сунела бузерила гьуни бехIбихьибсири Санчила шилизибси школализиб. Илаб Гулжанатли 7 дус хIянчи барибсири. КIинайс ил хъалибаргличил рарх, 1976 ибил дуслизир МяхIячкъалализи гечриубсири. Муруйчил рарх телевидениела ва радиола шайчибси Дагъиста пачалихъла Комитетлизир рузули калунсири. 1988-1992-ибти дусмазир Дагъиста радиолизир дарган мезла дикторли рузиб. Дебали давлачебси бузерила гьуни гIуррара даимбиуб. 2000-ибил дуслизир ил «Хайдакьла район» МО-ла администрацияла архивла отделла бекIли, кIинайс гьаркьяси специалистла хIянчи бузахъули калунсири. ГIякьлучерси ва санигIят ункъли бяркъурси хIянчизар сарливан, ил чуйнара ХIурматла Грамотабачи ва Баркаллала кагъуртачи лайикьрикиб.
Бурули бирар, адамли назмурти лукIути сари уркIи далайбикIухIели яра ил бисухIели. Сунела мурул гIямрулизивад арякьунхIели, пашмандешли бицIибси уркIила хIял илини назмуртазиб иргъахъес рехIрихьибсири. Халкьличи, ВатIайчи диги черяхIдирути, гъабзадеш чедиахъути, поэтессала назмурти бучIанти-ургар дебали кьиматлатили детаурли сари.
Гулжанат Нажмутдиновала назмурти школала бучIантани илар зайдухъахъун.
«Гулжанатла назмурти гIерасес дебали гьамадти, амма лерилра адамла хIялани иргъахъутили детаур. Назму илкьяйдали каргьахъурли белкIес вирни — мекелли халати устадеш сари. Гъабзадешличила, ВатIайчи дигиличила илини делкIунти назмуртани пахрула биса алкIахъули сари. Тяп илди хIялани сунезир лерси Гулжанатли нуша ишбархIи ишар цахIнадяхъилра», — рикIи балбуцличир гъайрухъунси «Хайдакьла урунжуни» бикIуси литературала цахIнабикла вакил Разият МяхIяммадова.
БурахIелли, нушала газетализирра дурадухъун Гулжанат Нажмутдиновала назмурти, сарира дявила хасси балбуцлизир бутIакьядеш дирути дубурлантас багъишладарибти.
Гьайгьайрагу, балбуцличи учибикибтачи лехIирхъухIели, Гулжанат Нажмутдиновала пагьму районна халкьлис дебали дигахъни багьесли саби. ЛукIуси адамлис се саби бегIлара чихъси шабагъат? Адамтани илала пагьму кьабулбарни саби. ХIебиалли, Гулжанат Нажмутдинова халкьли кьабулрарибси поэтесса сари дикIес дирехIе.
Сунела Хайдакь машгьурбирахъес, илабти адамтас дезарикIахъес Г.Нажмутдиновас чIумаси арадеш, бузерилизир сархибдешуни дулгулра. БугабикIаб хIела кьалам!
ПатIимат Шахова
