Гьанна хIябэсил дус нушала улкали Украинала мер-мусаличиб дявила хасси балбуц дурабуркIули саби. Миллатчибачи къаршили бургъули, гъабзадешла баркьудлуми дурадуркIули сари ахIерси Дагъиста асил уршбани.
ВатIайс къияндикибси замана илис кумекбарес бусягIятла заманара СВО-ла мер-мусаличи саби гIяхIъулали арбашути бахъал леб. Камли ахIен илди-ургаб даргантира. Илар бутIакьяндеш дирули, камси заманалис отпускличи бакIибхIели, нушара илдачил гьаман къаршидиркулра, илдани дурути хабуртачил лехIдилзулра. Амма лебтанилра ца мухIлилизибадван бурули саби: «СВО-ла мер-мусаличиб душмантас къаршидеш дирес багьандан, итар дузахъути гьаннала заманала гьаркьяти, сари-сарил урцути «чякни» итмаданал хIисабдирес бурсивирес чебиркур. Ил шайчир сахъдеш дакIухIедирадли, илдани итмаданал нушала бургъанти мерлабиубти мер-муса белгидиру. ГIур чедирад иртескадирур».
ГIе, 80 дус гьалар детурхути ва гьаннала дявила анцIбукьунала ургабси мекелли халаси декIардеш чебиули саби. Амма, лерилра сагадешуни дяркъурли, гьарил секIайзиб гьалабяхI башули, душмантасра чIумаси бяхъ чейгахъули бургъули саби нушала уршби. Илди-ургаб леб, гьайгьайрагу, 20-личибад 30-йчи бикайчити дусмала жагьилтира. Буралли, илдигъунтани сагадешунира хъярхъли гIерису, дявила хасси балбуц бетурхуси мерличив секьяйдали вяшикIусил бала.
Наб ишаб сунечила бурес дигуси дарган урши Кьурбанов МяхIяммад Кьурбанович Лавашала районна МусультIемахьилизив 1999 ибил дусла июльла 9-личив акIубси сай. Сунела камти гIямруличи хIерхIеили, илини Украинала мер-мусаличиб бетурхуси балбуцлизирцунра ахIи, Сириялизир кадикибти дявила анцIбукьуназирра жигарла бутIакьяндеш дарес бажардивикили сай.
МяхIяммад Кьурбановли 2019 ибил дусла октябрьла 12-личибад Россияла гIярмиялизиб къуллукъбируси саби. Ил ВатIа гьалабси чебла ахъахъес Дагъистайзивад Рязаньнизи живарибси сай. Илаб, вягIда бигьи, дявила къуллукъуни жавабкардешличил тамандирули калун.
2023 ибил дуслизив М.Кьурбанов СВО-лизи арвякьунсири. Илаб илини 4 баз къуллукъбариб. КIинайс, гIергъиси дус – 2024 ибил дуслизив Сириялизи арукибсири. 17 баз Сириялизиб ил дявила чебла таманбирули калунсири.
«Дявила къуллукъуни тамандирухIели, хIела уркIиличиб калунси сегъуна анцIбукьличила гьанбушес вируда?» ибси дила суайс МяхIяммадли буриб: «Илдигъунти анцIбукьуни дахъал диуб. ХIябал бархIи къачагъунани алавдуцили, селра барес хIедирули калунтири. Чуйнара илдала хIярхIубаура дикира. Гьанна кьалли гIямрула бегIлара гIергъити секундуни сари калунти ибти пикруми акIуб». ХIера, сегъунти ибкьти аги-кьяйдализив калил жагьси урши. БикIаргу, дусмани ахIен гIямрула даража кабилзахъуси, вегIличи чедуркъибти гьанагарти анцIбукьунани сабину. МяхIяммадли илдигъунти ва цархIилти хабурти дурухIели, наб ил дусмадли набчивра гIяхIцадла халаси адам сайливан кабизур, илцадра дахъал къияндешуни чекасес ва чIямдарес кьадарбиублири илис.
МяхIяммад Кьурбанов бусягIятла заманала СВО-ла мер-мусаличив, Курсклизив сай. Илаб илини 2 базцадхIи дявила къуллукъуни тамандирули сай. Илала гъай хIясибли, Дагъистайзивад сунечил варх кIарахъан уршира лев. Сунечил барх гIур дарганти лебу или хьарбаибхIели сабри илра белгибиубси. Гьайгьайрагу, МяхIяммадличил гьатIира нушала цаванзаланти барх лебти биалри гIяхIсири. СенахIенну нушала дагъистанланти мурталра саби-ургаб уржибти ва балагьла гьалаб хункIван дебати саби. Жагьси уршилисра сунечил нешла мезли гъайбикIути узби биалри, дявила къияндешунира ахъес гьамадли бири.
МяхIяммад Кьурбанов, гъабзадеш дакIударни багьандан, Дявила Асилдешла 1-ибил ва 2-ибил даражала ва чумра цархIилти медальтачилра шабагъатлаварибси сай.
Сержант МяхIяммадлис камазла водитель сайливан, декIар-декIарти къуллукъуни гьунчидикахъесра чевкъули бирар: цацахIели бургъантас кумекла дехани дихули дирар, цацахIели душмайс къаршидеш дарес хIяжатти дявила гIягIниахълуми СВО-ла бутIакьянчибачи диахъу.
МяхIяммад Кьурбановичлис ва илала бархкьябас чула хъалибаргуначи жяв-жявли чарбухъахъес чIумаси арадешра дявила ахъси гьавра дулгехIе!
Салимат ГIялиева
