ГIялимтала гIевдухьли бетаурси ХIурхъила шилизибад, ил лугIилизиб — илизирад детаурти ГIяймаумахьила, МахIаргила, Ванашимахьила, ГIяялизимахьила шимазибадра, дурабухъунти гIялимти-ургаб гьанбушес дигулра Россияла машгьурси гIялим, биологияла гIилмуртала кандидат, гIилмула хIяракатчи, РФ-ла санигIятлашалси чебяхIси даражала багьудила хIурматла хIянчизар, ДР-ла хIяйвантала урибси тухтур ХIямидов Юсуп Халимбековичла ура. Ишдус ил 90 дус виубли сай.
АкIубси сай Сергокъалала районна ГIяймаумахьилизив (Буцрамахьи) 1935 ибил дусла августла 11-личив. Илцадра баракатла, гIилму-багьудили парчбикIуси шилизивадси Юсуп Халимбековичра цархIилсигъунали виэсра хIейри. Гьайгьайрагу, илра гIилмула ахъанайчи халаси гъираличил чевяхIяхъиб.
Илини 1956 ибил дуслизиб ХIурхъила урга даражала школа таманбарибсири. Ил дусличибад 1959 ибил дусличи бикайчи гIярмиялизиб къуллукъбариб.
Мурхьти багьудлуми касес, гIилмулизив гьалавяхI вашес ибти кьасаначил Ю.ХIямидов 1962 ибил дуслизив Дагъиста пачалихъла шила хозяйствола институтла (ДСХИ) ветеринарный факультетлизи кархули сай. 1967 ибил дуслизиб ил хъараахъур. Багьудлумачи гъаргъси Юсуп гьар-чинавалра гьалавси вири, гьачам белчIунси секIал, ункъли гIебиси. Илди кIинайс илис узухIелира пайдаладиубтири.
1967 ибил дусличивад 1970 ибил дусличи бикайчи ДАССР-ла шила хозяйствола Министерстволизив ветеринарный отделлизив узес вехIихьиб. Багьудлумала гьарзаси дякь даимбарес кьаслизив ил 1971 ибил дуслизив Одессала шила хозяйствола институтла аспирантурализи кархули сай. 1974 ибил дуслизиб кандидатла диссертация гьарбизурдешличил бетерхахъур ва биологияла гIилмуртала кандидатла уличи лайикьикиб.
1975 ибил дусличивад 1980 ибил дусличи бикайчи шила хозяйствола мицIирагла хIял-тIабигIят руркъуси кафедрализив ассистентли узули калун, ил дусличивад 1989 ибил дусличи бикайчи — баягъи кафедрала заведующийли, илхIейчивад 2004-ибил дусличи бикайчи — ДСХИ-ла ветеринарная медицинала факультетла деканни. Гьар секIайчи чекайзурси, гьариллизирад жавабкардеш тIалабдируси сайливан, илини сунела бузерила бетуц гIягIниси тяхIярли тIашбалтулри, лерилра хIянчи ункъли детерхахъес бажардивиркулри. Иличибли Юсуп Халимбековичли бархкьябала ургаб халаси хIурматра сархиб.
Асилси бузерилизир диахъубти сархибдешуни багьандан, 1995 ибил дуслизиб, ДР-ла Пачалихъла Советла Председательла ХIукму хIясибли, илис «Дагъистан Республикала ветеринарияла урибси тухтур», 2005-ибил дуслизиб биалли – «Россияла Федерацияла санигIятлашалси чебяхIси даражала багьудила хIурматла хIянчизар» ибти хIурматла умачи лайикьикиб.
Ил гIилмула авцIалицад хIянчила авторра сай (илдазирад верхIел – методический пособиебала).
Юсуп Халимбековичли 2014 ибил дусличибад бамсриихъули саби. Буралли, ил Дагъиста халкьла поэт МяхIяммад ХIямидовла виштIасигъуна узи сай. Дагъиста гIяхIдешлис бузути, гIилму вавалибяхъяхъес хIяракатлизибти, нешла мез ва литература гьаладяхI ардукес къайгъичебти узбачи пахрухIебаресра хIейрар. СенахIенну илди машгьурси гIялимтани Дагъиста тарихлизир мурхьти къел калахъун. Илдигъунтачила гьанбикахъни, ишхIелла жагьилтази илдачила багьахъни нушала чеблара саби.
ХIурматла Юсуп Халимбекович, нушала газетала шайзивад акIубси БархIиличил мубараквирулри! ХIела узи-уршиличи, пергер хъалибаргличи, дурхIначи ва дурхIнала баркьибтачи хIилнавиркьули, ара-сагъли калаби!
Ахирличиб Ю.ХIямидовла гъамси тухум, Р.ХIямзатовла уличилси республикала Миллатла библиотекала край руркънила отделла хIянчизар Салимат ХIяжиевани илис хасбарили, белкIунси назмура гьалабирхьулра (ил саби белкIунсиван, хIурхъила лугъатличил батурси саби):
«Узирши-шанти бигул,
Нушила Юсуп абзи!
АкIунил бархIиличол
ХIу мубаракикьулли!
Сельхоз институтлизир
Дахъал хIянки дакьади,
Барх бузутела ургар
ХIурмат-хатир сархади.
ХIяйонтела тухтурти
Чумра гьуйшибушади,
ГIякьлу-насихIят, къайгъни..,
Бахълис багалайгьади.
ЦIидихьла галгубела
Гьар дус анхъ бухъихъади,
Анхъон бирхъаб дурхIнира —
ХIула чархла кьялуби.
Анкъи ванал, шанг гIявал
ГIяйшатра датаб хIула,
Дигили ламикIули
ХIу хьалъаби нушила!»
Салимат ГIялиева
