Дубримахьила ши­ли­зи­радси Муъ­ми­­нат Мя­хIям­­мад­сягIидовани МяхIяч­къала­лизибси культ­прос­ветучилищела театральный фа­культет таманбариб. 2007-ибил дусличирад сунела шили­зиб­си культурала Юртлизир худо­жест­венный руководительли рузес рехIрихьиб.

2012 ибил дуслизир культурала Юртла директорли рузахъес шурратур. Ил 2018 ибил дусличирад рехIрихьили, Дубримахьила библиотекала заведующаяли рузули сари. Муъминат Ахъушала районна хьунул адамтала Советла членра, авал дус сунела шилизир ил Советла председательра сари.

Муъминатли сунечи хъарси хIянчи чебетаахъили, жаваб­кар­дешличил даимбирули сари. СДК-ла художественный руководи­тель­ли, гIур директорли ру­зу­хIе­ли илини культурала управлениелизир детурхути шадлихъуназир, далдуцуназир жигарла бутIа­кьян­деш дирутири, миллатла палтарра чегьурли, дигалли делхъ дири, дигалли байрумтачи ба­кIибти гIяхIлас гьаладихьес жура-журала миллатла дуббатуни далкьарахъи.

Гьанна илини библиотекала заведующаяла хIянчи жаваб­кар­дешличил бетурхахъули са­ри. Биб­лиотекала юрт жагали ка­би­захъур, мер-муса гIяхIси тя­хIярличи душиб. Илар лер дахъал жузи, плакатуни, журналти, декIар-декIарти гIямзурби. Биб­лиотекализир Муъминатли дус­ла духIнар детурхути лерилра байрумтас хасдарибти шадлихъуни, жузала выставкаби, поэтунала, писательтала юбилейтас хасдарибти шадлихъуни дурадуркIули сари, школализиб бучIантачил дарх конкурсуни, байрумти ва цархIилтира шадлихъуни детурхахъу. Наркотикуни ва экстремизм сегъунти вайти секIал сарил иргъахъути ихтилатуни диру.

Дубримахьилизибадти СВО-ли­зир бутIакьяндеш дирути ва илди анцI­букьуназиб алхунти бургъантачила, илдала гъабзадешличила, ВатIа хъархIерагардеш ва халкьла че­лябкьла багьандан секьяйда чула арадеш ва жан ахIерахIедарили бур­гъутил бурули сари дурхIнази. СВО-ла бутIакьянчибачила баянти, су­ратуни, илдала шабагъатуначила белкIани дучили, библиотекализи ба­шути илдачил тянишбирахъули ри­рар.

Муъминат Ахъушала районна администрацияла шайзирад чумал ХIурматла Грамоталичил шабагъатларарили сари. Ил мал­хIямси, духуси хьунул адам сари, сунела гIямрула вархкьячил барх илдани хIябал урши-рурси абикьур, илдас гIяхIси бяркъ бедиб, чебяхIси даражала багьуди касахъиб. Гьанна илдачибад акIуб­ти шел дурхIяра леб, илди аби­кьахъесра кумекбирули сари Муъминатли.
Урши Рашидли гъабзадешличил ВатIайс къуллукъбариб, спортсменра сай, регбила шайчирти абзаназир илини гьаларти мерани дурцули сай, дурала пачалихъуназир дурадуркIути абзаназирра бутIакьяндеш дирули, спортла мастерла у сархили сай.

Гьаннала гIергъира Муъминат­ла гIямрулизир ва бузерилизир сар­хибдешуни имцIадикIули дигулра.

 

С.ГIябдуллаева