Ишди бурхIназир шагьарла ца кьакьализир лайкадакIибти, дягIли ита-иша хъусдяхъибти дахъал жярга-зекъ чедаэс кьадарбиуб. Илис сабаб бурги мякьларти, хасти тIакьни лерилра нясдешунани дицIни. Жярга-зекъ илдазирад кадикили, арагIебли кьакьа бицIахъилри. ХIябилра цIахбизеси сурат лебри…
Илдигъунти аги-кьяйда гьаладилзули сари нушаб шагьарла дахъал мер-мусаличир. МяхIячкъала биалли, республикала тах шагьар сабгу, сен-биалра жярга-зекъ ардихнила, илдазирад тIакьни заманаличир умудирнила масъала жявлил гьунчибикахъес замана баилигу. Нушачи, хаслира – гIергъити дусмазиб, сецад гIяхIли башули. Гьайгьайрагу, нушачир дахъал чедаэсти жагати мер-муса лер. Илди гьачам чедаибси сагадан иша чарухъес хьуликIули сай. Амма лайкадакIибти жярга-зекъли илдала куц булъахъули саби.
ХIера, нушала хIянчилабад гьарахъли ахIенси, урхьула дуб дебали жагали балкьаахъур: адамтази бамсриихъахъес ва спортлизи ихъахъес лерилра шуртIри акIахъубли сари. БархIехъ дураухъунхIели, чебиули саби илаб сецад хъалибаргунани чула дурхIначил бамсриихъулил. Амма иларра нясдешуни кадирхьахъес хасдарибти лерилра тIакьни гарчли дицIили, алавчарлира жярга-зекъ тIутIукадиубли чедиур. Дигахъаси, илди ва илдигъунти цархIилти анцIбукьуни ахъти къуллукъуначибти адамтани хIисабдарили ва ил масъала лайикьси даражаличиб арзили.
ГIе, гьар-чинабалра багьахъни бархли лебри 60-70 азирла алапа бедлугули саби жярга-зекъ урасес хIянчиличи кабиибтас. Амма, нушала адамтас дигули ахIен ил кьялилизибси бетуцлизиб бузес. ХIера, нушала шагьар нясли калнила бекIлибиубси масъалара илизиб буили саби. Сен хIейгахъуси вегI хIерирути мер-муса умударес?
Гьалар илди хIянчи дурала мераначибад бакIибтани сарри дирути. Дурабад бакIибтази вегIла мер-муса ибгахъуливан ахIи, вегIли ункъли бала кьалли секьяйдали умудеш гIеббурцусил. Амма илди хIянчи дарес хIейгули саби. ХIебиалли, ахъти къуллукъуначибтас ил масъала арзес дигули хьалли, ил шайчиб кумекбарес дигутира камли уббулхъули саби. Сен-биалра, яра кьанни, яра жявли ил масъала ирзниличи бирхауди леб.
ВегI хIерирути мер-муса умули дихIес гьамадсигу, нясдарибти умудиресичиб.
Салимат ГIялиева
