Дахъал дусмазир сунени касибси санигIятлис марли, учительницали рузули сари Бутрила шилизирадси МяхIяммадова ЖумягI ХIяжисултIановна. ЖумягI акIубси сари хIурматла хъалибарглизир. Илала бегIти Каспийск шагьарлизи гечбиайчи, Бутрила шилизиб неш – учительницали, дудеш шоферли бузули калунтири.
ЖумягI МяхIяммадовани 1984 ибил дуслизиб тах шагьарлизибси Дагъиста пачалихъла пединститутла филологияла факультет таманбариб. Сунела бузерила гьуни бехIбихьиб МяхIячкъалализибси урга даражала школализир учительницали рузули.
ЖумягI МяхIяммадова чумал школализир рузули калун, ТIебекмахьила, Семгамахьила шимазирти урга даражала школабазирра.
2019 ибил дусличирад, сунела багьуди сагабарили гIергъи, Бутрила шилизибси урга даражала школализир Англияла мезла дурсри кадирхьули рузули сари. ЖумягI ХIяжисултIановна, дурхIнази багьуди касахъес къайгъибирни багьандан чумал Дипломличил, ХIурматла Грамоталичил шабагъатларарили сари. Ил чинар рузули кали риалра дурхIначи дигичерси, халкьла хIурматбирес балуси, малхIямси хьунул адам сари, суненира халкь-ургаб халаси хIурмат сархибси. Школала гIямрулизирра жигарла бутIакьяндеш диру, бучIантас ва илдала бегIтасра ил дигахъу.
ЖумягI ХIяжисултIановнани сунела гIямрула вархкьячил барх авал рурси абикьур, гIяхIси бяркъра бедили, чебяхIси даражала багьудира касахъили, гIямрула гьунчи дураиб.
Халалгъуна рурси Избербаш шагьарлизир полицияла кадровый кабизлизир майорли рузули сари, кIиэсил рурси МяхIячкъала шагьарлизир Ленинский районна администрацияла бекIла заместительли рузули сари. КIел рурси Москвализиб хIербирули ва бузули саби. Ца рузули сари пачалихъла клиникализир цулбала тухтурли, риштIалгъуна рурси рузули сари дурхIнала ихтиюртала шайчир рузуси Уполномоченный Аппаратлизир М.Львова-Беловала насихIятчили.
ЖумягIла гIямрула вархкья Н.НухIрадинов Семгамахьила школализив рисованиела, черчениела учительли узули калунсири, гьанна ил пенсияличив сай. Гьаннала гIергъира ЖумягIла гIямрулизир ва бузерилизир сархибдешуни имцIадикIаб.
Сабият ГIябдуллаева
