Ардякьунти бурхIназиб тах шагьарлизиб Дагъиста культурала гIямрулизиб гIячихъси балбуц бетерхур — художник ПатIимат ГIямаровала «РухIла рангани» бикIуси выставка гьалабихьиб.
Ункъли бетерхурси выставкаличи искусство дигахъути, хIукуматла органтала ва жамигIятла организациябала вакилти цалабикилри. Илди лебилра Дагъиста культураличи ва художникла пагьмуличи дигили цабирулри.
Бурес чебиркур, выставка дураберкIибсири «Самородки» бикIуси республикала проектла дазурбазиб. Лебтанилра балуливан, баягъи проект машгьурбиубси саби искусстволизир сагати уми гьаргдирнила шайчиб ва Дагъиста декIар-декIарти мер-мусаличиб хIербирути пагьмучебти художникуни гIеббурцниличил.
Выставкаличир ПатIиматла 80 хIянчи гьаладихьилри. Лерилра суратунани чула жагадешличил адамла уркIи хIяйранбирахъулри ва вегIлис тяништи, гъамти мер-мусаличи виахъулри.
П.ГIямарова Лавашала районна Няскентла шилизир, 1962 ибил дуслизир акIубси сари. Ил кьисла уста Ибрагьимла хъалибарглизир халараибси сари. Ил багьанданра ПатIиматли лерил сунела гIямрулизир ахIерси ВатIайчи ва някъла бузериличи диги хIурматличил дихули сари.
ДР-ла культурала шайчирси министрла заместитель Марита Мугадовани «Самородки» проектла халаси кьадриличи лебталалра пикри бяхIчиаахъиб.
Культурала министрла заместительли буриливан, ПатIимат ГIямарова сарицун рузуси художник сари, суненира творчестволичил барх сари акIубси биштIаси ВатIайчи уркIила гьаргдеш ва диги гьаргдируси. «Самородки» бикIуси проектла бекIлибиубси мурад— республикала районтазир «дигIяндикибти» пагьмурти — «жавгьар духуриби» даргни ва илди гIердуцни.
Марита Мугадовала гъай хIясибли, илди пагьмуртани жагадешцун ахIенну, миллатла тарихра гьаргбирули саби.
ДР-ла культурала шайчибси Министерствола шайзирад ил бархIи П.ГIямарова шадлихъла аги-хIяйзир дипломличил шабагъатларариб. ПатIиматличила ил бархIи дахъал ванати дугьби зайдухъун.
Балбуц цахIнабси сурат касниличил ахирличи бикиб.
Рабадан БяхIяммадов
