ВатIан ва халкьла челябкь­ла багьандан чула жан ахIерахIедарили, Ахъу­шала район­ни­зи­бадти чумилра гIяхI­гъаб­за жагьил адам дя­ви­ла авлахъличиб алхи саби.
Илди гIяхIгъабза бургъантачила нушани ва чеабиуси наслули хъумартес асу­хIе­бирар.
Илдазивад ца сай ХIям­ши­мала шилизивадси Кьурбанов Расим Гъазиевич. Расим акIу­сири 1990 ибил дуслизив, 1996 ибил дуслизив ил ХIямшимала урга даражала школализи вякьунсири. 2007-ибил дуслизив школа таманбарили гIергъи, Расим Кьурбанов Мя­хIячкъалализибси Москвала пачалихъла авто­мобильно-дорожный технический университетлизи керхур.
2013 ибил дуслизиб бел­чIу­ди таманбарили, «Организация и безопасность дорожного движения» бикIуси санигIят касиб.
2014 ибил дуслизив Расим Гъазиевич ВатIайс къуллукъбарахъес живарибсири. Ил ВатIайс мардешличил къуллукъбарили хъули чарухъун. 2017 ибил дуслизив Расим хъаллавиубсири, илини сунела гIямрула рархкьячил барх кIел рурси абилкьулри.
2022 ибил дусла сентябрьла 26-личив Расим СВО-лизи арукибсири. ИлхIейчивад Украинализив сайри, медицинала взводлизив ургъули, дявила авлахъличибад бяхъибти, дяхъи-хъаслабиубти бургъанти дурайсули. Къиянти мер-мусаличибад илини, 150 километрлацад гьуни ахъили, бяхъибти бургъанти госпитальлизи биахъутири.
Сунечил барх бургъути дурхIнани бурули саби, Расим лебтасалра кумеклавирусири, адамтас гуманитарный кумек бихусири, чис се гIягIнили биалра ил манпагIятвиэс къайгъилизив вири или.
2023 ибил дусла майла 3-личив Запорожская областьла Дорожнянка бикIуси шилизив Расим Кьурбанов алхун, сай левси мерличиб снаряд баргбердили.
Расим Кьурбанов ВатIа хъарбаркь таманбирули, гIям­рули­зи­вад арякьун. Илала кIелра рурсира хьунулра калун.
СВО-лизир чедаахъибти гъабзадешра, гьунартира, ВатIайс мардешра багьандан, хIялалли къуллукъбирули сунела жан ахIерахIедарибси Кьурбанов Расим Гъазиевич РФ-ла Президент В.Путинна ХIукму хIясибли, Гъабзадешла орденничи лайикьвикиб.

С.ГIябдуллаева