Пикриухъалли, лерилра санигIятуни пайдалати ва мягIничерти сари. ДекIардеш агара нушазивад гьарил сегъуна баркьудилизи ахъилил, ил баркьуди уркIили кьабулбирули биалли, адам талихIчевли вирар. Илгъуна адамлис гIямрулизиб сунела мер баргибси или бикIар. Баркьудилизир яра санигIятлизир сархибдешуни диахъес багьандан, школализиб белчIуди касес чебиркур. Адамла гIямрулизиб школала мугIяллимтанигъуна багьудлумала хьулчи чилилра кабирхьуси ахIен. МугIяллимтани саби чеалкIути наслубала челябкьла белгиси жураличи биркахъуси, багьудлуми ва дурхъадешуни гIерисахъути, пагьмурти гьаргдирути ва дурхIни гьалабяхI башахъути. ХIебиалли, мугIяллимла санигIят лебтазибадалра бегIлара кьиматчебси саби викIес вирар. ХIера, илгъуна санигIят гIямрула бетуцли бетаахъурли сари математикала мугIяллим Зугьра ГIусманованира.
ГIусманова Зугьра ГIямаровна акIубси сари Сергокъалала районна КичихIямрила шилизир, бахъал дурхIнала хъалибарглизир. Шила школа таманбарили, ил ДГУ-лизибси физикала факультетлизи карерхурсири. 1990 ибил дуслизиб вуз ункъли хъараахъурли, Избербашла 8-ибил школализир бузерила цаибти гунзри кацIибтири. Илди гунзри халаси гьуни ахънилис бехIбихьудли детаур. Зугьра ГIусманова ил школализир 35 дус математикала мугIяллимли рузули сари. Илди дусмала духIнар гьар бархIи сунела черкад рузули, санигIятлашалти устадеш чеахъдирули, сагати тяхIяр-кьяйда дургули, гьаларяхI рашули сари. БусягIятла замана илини белчIудила-бяркъла хIянчила шайчирси директорла заместительла къуллукъунира дузахъули сари.
МугIяллимла хъалибарглизир халарикIуси рурсили учительла санигIят даимбарес пикрибарибсири. Зугьра ГIусмановала неш бехIбихьудла классунала мугIяллимли рузусири ва 35 дусличибра имцIали шила школализиб хIянчи барибсири.
З.ГIусмановани сунела дурсрачиб дурхIни пикрибикIахъес, лехIирхъахъес ва бурибси иргъахъес, хIербикIахъес ва секIал чебиахъес, гъайбикIахъес ва чула пикруми дурахъес бурсибирули сари. Школализиб бучIути дусмазибцун ахIен дурхIнас математикала мисалти ирзес хIяжатси, ил таманбарили гIергъира илди математикаличил зумали къаршибиркути саби. Сегъуна баркьудилизи ахъалра, чидил санигIят бузахъалра, адамлис секIал бекIлизиб хIисаббирес, хIерличил лугIурби умцес ва пикрибикIес балес чараагарли чебиркур. ДурхIни цагъунти ахIен, цали гьамадли гIебису секIал, цархIилли – къиянни. Лебтанилра цаван ункъли балуси ахIен математика. Ил багьандан Зугьра ГIусмановани, гьарилличи балбиркуси тяхIяр балбуцили, дурхIя предметличи гIевваахъес къайгъни дакIудирули рирар.
Гьарил мугIяллимлис сунела предмет дигахъуси, иличи иштяхI лебси, ил руркънилизир белгити сархибдешуни дирахъуси дурхIя вяркъни халаси талихIлизи халбируси саби. ХIера, З.ГIусмановани бучIахъути дурхIнанира олимпиадабачир жигарла бутIакьяндеш диру, гIяхIти хIясилти чедиахъу ва гьаларти мерани сарху. Илизиб саби мугIяллимла хIулбукIри.
З.ГIусмановани кIел дурхIя абикьур, илдази чебяхIси даражала багьуди касахъиб ва гIямрула бягIуси гьунчи дураиб. Илала рурсила уршира, республикала декIар-декIарти конкурсуначир бутIакьяндеш дирули ва цаибти мерани кайсули, белчIудилизив гьалавяхI вашули сай.
Багьуди гьалабяхI башахънилизи Зугьра ГIусмановани кабирхьуси пай хIукуматлира ахъли кьиматлабариб. Дахъал дусмазир хIялалли рузни багьандан, ил «ДР-ла багьудила отличник»-ла уличи лайикьрикиб, лер илала гIяхIцад грамотабира.
Зугьра ГIямаровнас бузерилизир гьаннала гIергъира дахъал сархибдешуни дулгулра.
ПатIимат Мирзаева
