ИшхIели кадиркути аги-кьяйдали, дявила анцI­бу­кьунани хасси кьялилизир санигIятлашалти устадеш диахъни тIалаббирули саби. Гьаркьяти технологияби пайдаладарили, душмайс къаршидеш дирни гьанна дебали мягIничебси бутIали бетаурли саби.
Сарицун урцути гIягIниахълуми (дрон) ишхIели дя­­вила шуртIразир зумали пайдаладирни, чисалра ди­гIяндеш ахIен. Ил багьандан ил шайчир бур­си­де­шунира касес, сагаси тяхIярла санигIят­ла­шалти ус­­тадеш гIерасес чевкъули саби. Амма ди­геси са­би ил бетуц ункъли балути, ил гьалабяхI ар­букес къай­гъи­­чебти жагьилти бархIиличи-бархIи им­­цIабикIни. Ил шайчирти устадеш чедаахъес им­канбакIиб иш­­ди бурхIназиб республикализиб бе­терхурси чем­пионатличирра. «Труд» стадионничиб ду­ра­бур­кIу­си дронани дуцIдирнила абзлизир Да­гъиста гIяхI­ти­­гъунти спортсментани бутIакьяндеш да­риб, илдани са­би командабазиб бузес бирнила къи­ли­къуни гьарг­дариб.
Балбуцла дазурбазиб, илкьяйдали тамашала программара чебаахъиб: дрон-баскетбол, БПЛА-ла операторла бузери бузахъуси хIянчизар ветаахъес имканбикIахъути тяхIяр-кьяйда, жура-журала абзани, викторинаби.
Буралли, дронани ишбархIи жигарчерли пай­да­ладирули сари гIямрула цархIилти бету­цуна­зир­ра: туризмализир, шила хозяйстволизир. Жагьил­тала гьанна дронани дузахънила шайчир багьудлуми касес иштяхI, сагаси санигIятличи гъира-гьуцI лерни чебиулри абзанала гьарил бутIализиб.
Илди абзаназир даргала районтала вакилтанира бутIакьяндеш дариб ва гIяхIти хIясилти чедаахъиб. Наб ишаб бурес дигулра цаибил мерличи лайикьи­кибси, Хайдакьла районнизивадси Рабазан Расу­ло­вич ЖабрагIиловличила. Дронани дикнила чем­пио­нат­личир илини чихъти устадеш чедаахъиб.
КIиибил ва хIябъибил мер буцибти спортсментира Хайдакьла районна вакилтили сабли уббухъун. Гьай­гьайрагу, ил нушала цахIнабси сархибдешра саби.
Ил чемпионатла ахирласи бутIала хIясилти хIя­сибли, бегIлара гIяхIтигъунти спортсментани ­СКФО-ла абзаначир Дагъистайс вакилдеш дирути са­ри. Дир­хехIе, Рабазан ЖабрагIиловли илабра лайикьси мер бурцниличи. Илдигъунти жагьилтачи ну­шани пах­рубирулра. Гьаннала гIергъира сунени чеб­би­кIиб­си бяхIчибизлизир халати сархибдешуни ва гьарбизуни дулгехIе!

Салимат ГIялиева