Краснодарла крайла Туапсе­ли­чи­бад­ли гьарахъли ахIенси Лер­мон­то­во бикIуси шагьарлизир «Orient World Cup mixed martial arts «Star Fighter» ибти, Дунъяла Кубок багьанданти абзани де­тер­хур. Балбуцличи мурталра бахъал спорт­сменти цалабиркути саби. Ишдуслизир илди аб­заназир Россияла 20 регионнизибадти, Азер­­байжайзибадти, Армениялизибадти ва Гру­­­зиялизибадти 547 спортсменни бутIа­кьян­деш дарибтири.
Шел бархIила духIнар спортсментани чедиахъути устадешла, кьуватчебдешла ва чедибдеш сархес ибти кьасанала гIяхIдешличирли аб­­заначир диахъубти сархибдешунани хIер­би­кIу­ти тамашабирахъутири.
Устадешчевси тренер Бадави ХIясановли бекIдеш дируси Дагъиста командали абзаначиб цаибил мер сархиб. Дубуртар Улкала спортсментани саби гIяхIти устадешличил бегI­биъни ва ункъли хIядурбиъни чебаахъиб. Дахадаевла районнизибадти спортсменти ка­бурхуси Дагъиста командали илкьяйдали мягI­ни­черти абзаначиб гьалабдеш сархни лебгIеб ахъси даражала ва гапличи лайикьси баркьудира саби.
КIиибил мерличи лайикьбикиб тренер Юсуф Мамедовли бекIдеш дируси ­Челябинскла областьла команда.
ХIябъибил мер сархиб Сергей Филимоновли бекIдеш дируси Ростовла областьла командали.
Дахадаевла районнизибадти спортсменти уркIи-уркIилабадли мубаракбарес лайикьли саби ва илкьяйдали чедибдешличил чарбухъниличил. Хаслира халаси баркалла багьахъес хIяжатли саби тренер МяхIяммад Кьурбановлис. Илала бамсриагарси бузериличибли ва сунени бузахъуси санигIятлис мардеш дирниличибли саби спортсментани илдигъунти сархибдешуни диахъубтира.
«Дунъяла Кубок багьанданти илдигъунти мягIничерти абзанани гIулухъаби-ургар гьалмагъдеш чIумадикIахъули сари. Нуша хIерлира лябкьуси дуслизир дурадуркIути абзаначи кадизес», —буриб Дахадаевла районна командала тренер МяхIяммад Кьурбановли.

Дахадаевла районна администрацияла
пресс-служба