Школализивад вакIили, Азаматли портфель столла уди лайбакIиб ва, хъярхъли палтар дарсдарили, шадибгьунчи дураухъун. Дураб дурхIни агара, хIебиалли футболли биркьуси майдайчи арбякьи саби или стадионничивяхI ватихьиб. Уршила уркIила гьав ахъси даражаличибри, ил тIяхIикIули аркьулри. Азамат сунела юлдаш къапучи ГIяхIмадлис гол битирхъис ва ил гIясиирахъис или пикрумази гIелаикилри.
Азамат стадионничи гъамикIулри, илини дурхIнала тIама-гьама дикьулри. Рахли илизи жииб:
— Урши, ва урши, хIу Азамат ахIенрив?
Уршила гьалаб кIел мурул адам тIашлири.
— Сайра. ХIушаб се гIягIнили? – хьарбаиб уркIухъунси уршили.
— УрухмакIуд, нушани хIед селра вайси хIебирехIе. Нуша хIела юлдаш ГIяхIмадли дархьилра. ХIела илгъуна юлдаш левсигу? – цаличи ца хIеръили пишбяхъиб гIямултар мурул адамти.
— Левси сай. Гьанна ну иличи аркьулра, ил набчи хIерли сай, — иб уршили стадионничи тIул бяхIчиаили.
— Агара хIела юлдаш итав. Ил къияйзи викили сай. Илини хIу живарахъес нушази тиладибариб.
Урши васвасикIни хIясиббарили, мурул адамтани ил къалабавариб, пикрумазив вархахъес дигули.
— Ваши къалабали нушачил варх, ил ишавадли гьарахълав ахIен.
Азамат гIела витIакIиб. Илини илди мурул адамти сунела гIямрулизиб бегIла гьалаб сабри чебиути ва стадионничибад сунела юлдашла тIама бикьулри. Уршили илдазивад гьавухъес пикрибариб. Мурул адамти шакбикили, урши уциб ва, вявхIейкIахъес мухIли гIекIили, машинализи гужли катес кьасбариб. Урши урухиубли, тIама-гьамали иркьес вехIихьиб. Игъбарлисван, мякьлабад машина шалгIеббухъун. Машинала бухIнабти жагьилти мурул адамтас урши вигIес дигниличила шакбикиб ва, машина тIашаили, Азамат верцахъиб. Урши дебали уркIухъун ва дуцIли хъули арякьун. Хъули севан саваибал илис гьанбиркули ахIенри. Илала биштIаси уркIилис михъирлизибад дурабухъес дигусигъунари, илцадра цIакьли тимхъбикIули. БегIти чарбиубхIели, Азаматли сунечил бетаурсиличила буриб. Илдани гIярзбарес полициялизи зянкъдяхъибхIели, чула урши верцахъибтани макрукьяби полициялизи баахъниличила багьур. ГIергъила бархIи Азамат бегIтачил варх полициялизи вякьун ва сунечил бетаурси анцIбукьличила буриб. Полицияла хIянчизартани илдази стадионна мякьлаб тIашбизурти мурул адамтани Азаматличи хIерти уршбала ихтилат аргъили, ил вигIес пикрибарниличила буриб.
Полицияла хIянчизарли Азаматлизи хIебалути адамтачил гъайикIес, илдани бурибси бирес, илдазирад муридешуни ва цархIилти секIулти сайсес асухIебирниличила аргъахъиб. Азаматлис школализиб мугIяллимтира хъулиб бегIтира илкьяйда бикIни гьанбикиб, амма ит манзил иличила уршили хъумкартурлири. Дурибти насихIятуни жявли хъумартни илис халаси балагьличи шурбулхъули хIилхIи калун. БегIтани урши верцахъибтасра полицияла хIянчизарлисра баркалла багьахъур ва хъули арбякьун.
Школализиб Азаматли сунечил бетаурсиличила буриб ва, илгъуна анцIбукьлизи хIебикахъес, сунела юлдашуни махбариб.
Марият ГIялиева
