Ахъушала районнизирти багьудила авал учреждениелизир дурхIнас дуцIрумла каникултала манзиллис абхьибти, хIерила замана бамсриихъахъес ва арадеш къулайбирахъес хасдарибти лагерьти лер дузули. Илди абхьибти сари июнь базла бехIбихьудлизир.
Лагерьти лерти сари Ургубамахьила урга даражала школализиб «Рассвет» бикIуси, гьачамли 60 дурхIя кьабулбируси, ва «Радуга» бикIуси саби Усишала лицейлизиб, цагьакIли 80 дурхIя кьабулбируси, иларра кIел смена дузахъули сари. «Надежда» бикIуси Усишала хIябъибил ва «Дружба» бикIуси ГIялиханмахьила урга даражала школабазирра лер 2 лагерь. Илдазиб 60 дурхIя кьабулбирули саби, иларра кIикIел смена сари.
ГIядатли бетаурливан, лагерьлизибти дурхIнала савли зарядкаличибад бехIбирхьули бирар.
ГIур берхIи гIелабикайчи дурхIнани жура-журала хIязаназир, спортла шайчирти абзаназир, суратунала ва цархIилтира конкурсуназир, викторинабазир, делхъани дирули, далуйти дучIули, назмурти дурули, шадлихъуназир бутIакьяндеш дирули бирар. ДурхIнани иштяхIличил ва разили замана буркIули саби.
ДурхIнас лагерьтазир гIяхIти шуртIри акIахъубли сари. Илди халаси замана тIабигIятличиб саби. Лагерьтазиб дурхIнани декIар-декIарти далдуцуназир бутIакьяндеш дирули сари. ДурхIни хIерила манзиллизиб саби бихIути, илаб уршби-рурсби кIина дуббатлира балхули саби.
ДурхIнас ва илдала бегIтас халаси гIяхIдеш саби дурхIни воспитательтала хIерудилиуб биъни, чула бегIтачибад гьарахъхIебикили, пайдалаличил замана буркIни. Каникултала манзиллизибра педагогунани дурхIнала багьуди ва пагьмурти имцIадиахъес, илди гьалабяхI башахъес къайгъибирули саби. ДурхIнани бахъал сагати юлдашунира бургу.
Вайти анцIбукьунази хIебикахъес багьанданра воспитательтани дурхIначил дахъал ихтилатуни дурадуркIули сари.
Илкьяйдали дурхIначил духIнарти къуллукъунала отделла хIянчизартира гьунибиули саби, илдани дурхIнази ихтилатуни дирули саби цIализибад, гьундурачиб сегъуна мяхIкамдеш бузахъес хIяжатлил иргъахъути.
Сархибдешуни диаб чула баркьудилизир! ДурхIнала лагерьтачила гIяхIти гьанбикунира калаб!
С.ГIябдуллаева
