Ишди бурхIназиб дурхIнас хасбарибси байрамличиб жагати палтарличилси рурсили къугъаси тIамаличил далай зайбухъахъун. Лебилра учибикибти адамти тамашабиуб ил рурсила пагьмуличи. «Чила сарира, бахъ жагали далай белчIунгу» – или цализи ца хьарбикIулри.

Ил къугъаси, жагали далайрикIуси КургIила шилизибси урга даражала школала директор Марьям ХIяжиевала ва Ахъушала районна духIнарти къуллукъунала  отделла хIянчизар Рабазан БяхIяммадовла рурсили уррухъун.

Марьям ГIусмановнази хьарбаира чумъибил класслизир ручIулив хIушала пагьмучерси рурси или.

– Хадижа КургIила урга даражала школализир ручIуси сари.  Хадижани ишдус цаибил класс таманбариб. Ил далай нуни ЧебяхIси Чедибдешла БархIи нушала школализиб белчIес хIядурбарибсири. Ахъушала дурхIнала пагьмуртала Юртла хIянчизартас илаб белчIунхIели гIяхIбизурли, илдала тилади хIясибли, байрамличибра белчIахъунсири. Дила халалгъуна рурсира жагали далайрикIуси сари, гьанна риштIалгъуна Хадижасра дигули сари далайрикIес, – буриб Марьям ХIяжиевани.

Хадижала далай дергъла темалис хасбарибси сабри, адамтази бируси тиладиличила, ванзаличирти дургъби тIашдизахъес, биштIатас ва халатас даршудеш хIяжатли биъниличила.

Хадижала челябкьлализир сархибдешуни ва даршудеш диаб! БегIтани гьарра шайзирад гIеррурцули, пагьмуртира имцIадикIахъули хIерриэс кьадарбиаб Хадижас!

С.ГIябдуллаева