ГIядатласи адамли нуша-алав кадиркути анцIбукьуни художникливан сипатдарес сеналра хIейрар. Художникла сай-вегIси, чичилра цугхIебиркуси хIер бирар гьарил секIайчи, алавчарси дунъяличи, гIямрулизир детурхути далдуцуначи. ХIера, илдигъунтала лугIилизивадси сай иш макьалала игит, художник, дизайнер-декоратор Закарья МяхIяммадович Закарьяевра.
АкIубси сай ил 1975 ибил дусла июньна 22-личив Сергокъалала районна Мурегала шилизив. З.Закарьяев РФ-ла художникунала Союзла член сай.
Илала мягIничерти хIянчурби мяхIкамли дихIули лер П.С.ХIямзатовала уличилси ДМИИ-лизир, илкьяйдали Россияла, дурала улкнала цахIнарти ва вегIдешла коллекциябазир. З.Закарьяевли шел хасти выставкара дурадеркIибти сари «Тах шагьар», «Арцантала базар», «Базарла бархIи», «Блошинала базар», «Арцла хIял-тIабигIят».
Дагъиста машгьурси художник Закарья МяхIяммадович ишхIелла жамигIятла бяхIчибизуначил гьалавяхI вашуси адам сай. Илала хIянчурбира урхIмешули ахIенти сари, илди цархIилтала хIянчурбазирад дебали декIардулхъути сари, сарира гьаннала заманала аги-хIяйчи далдикибти. Советский манзилла мегьла арцлизирад, буркьа клавиатурализирад, пенопластлизирад ва цархIилти секIултазирад илини арт-объектуни далкьарахъули сари. Илди Дагъистайзирцунра ахIи, илала дурарра гьаладирхьули дирар.
Художникли сунела хIянчурби далкьарахъухIели, лукIухIели, уркIила гьав кайсули саби гIямрулизирадти анцIбукьуназибад, илди сунела пикруми-хIераначил чедирцIахъули. Илала портретунала игитуни Кавказла адамтала хIял-тIабигIятличилти саби.
Сай хIерируси хъалира илини сунела някъбани дарибти ваяхIличил жагабарибси саби. Ила ухIнаухъалли, жявхIелила манзиллизи ухIнаверхурсиван билзан. Лерилра илди секIултала ургаб хIисаббарес хIейрар нушала хала бегIтани зумали бузахъули калунси мирш. Буралли, гьаннала шимазибадти халкьли ил пайдалабирули саби ахъдаибти кьар дердес. Гьар-урла замунтазиб иличил арши иршутири.
Закарьяни бурибсири: «Дила ахIерси шилизивкад къунзикIухIели, хIерикIулра — ил гьунчиб. Алавчарли хIеризурра, чилра агара. ХIебиалли, мирш дила саби или касира. Бархьли буралли, гьанна иличи чилалра хIяжатдеш агара. Илкьяйда гьанбиркули саби наб. Нуни биалли, иличи пикри бяхIчихIеили батес хIейубра. Илала някъликала тамай буркьбиублири. Сен-биалра, ил нуни касира».
З.Закарьяевли гьатIира тамашалати, адам хIяйранвиэсти ваяхI детаахъурлири гIядатла секIултазирад, дуркьдиубти секIулти дизайнерла хIерличил «мицIирдиахъубтиван» кадизахъурли.
З.Закарьяевли жигарла бутIакьяндеш дирути сари республикала ва лебил Россияла выставкабачир. Ила башути адамтанира илала хIянчурбас дебали ахъси кьимат бедлугули бирар.
ХIера, илгъуна тамашаласи пагьмуличил цархIилти художникуназивад декIарулхъуси сай белкIла игитра. Сай акIубси бархIиличил мубараквирули, илис сунела пагьмуртачил адамти разибирахъес гьатIиралра ахъси гьавра чIумаси арадешра дулгехIе!
Салимат ХIяжиева, Р.ХIямзатовла уличилси республикала Миллатла библиотекала краеведческий отделла хIянчизар
