Ишди бурхIназиб Ахъушала районнизиб, Северный Кавкзла халкьанала миллатунала культураби мяхIкамдирнила ва гьаладяхI дашахънила кьасличил, гIядатласи культурала «Букьур» бикIуси фестиваль бетерхур. Ил дураберкIибсири халкьани-ургабси фольклорла ва гIядатласи культурала «Дубурланти» бикIуси ХХIII ибил фестивальла дазурбазиб.
Илала хIурматла гIяхIялли, илкьяйдали фестивальла бутIакьянчили бетаур Липецкла областьлизибадси фольклорла «Воскресение» бикIуси ансамбль. Илдас ахъушанти районна дазуличиб кьацIличил, далай-делхъличил дяхI шалали гьунибаиб. Илди-ургаб лебри Ахъушала районна администрацияла бекIла заместитель Эльвира ХIясанхIусенова ва жавабла цархIилти хIянчизарти.
Гьунибаънила дазурбазиб, лебилра МухIела шилизибси «Гьанбикунала анхъ»-лизи бякьун, СВО-лизиб алхунти бургъантала хIурматлис тIашбатурси мемориалла гьала вавни кадихьиб.
Илкьяйда гIяхIлас имканбакIиб миллатла майдунти хIердаресра, илдас дебали тамашадизур гьар-урла бекIахъудила гIягIниахълуми, тIалхIяна, миллатла палтар, жура-журала хурегуни. Халкьла някъбани ваяхI дирнила кьялилизиб бузути пергер устнанира устадешла дурсри дурадеркIиб.
Фестивальла концертла программа бехIбихьиб Ахъушала районна адамтала миллатла палтар чедаахъниличибад. КIинайс «Воскресение» ансамбльлира лебтасалра чула пагьмурти гьаргдариб. «Ахъушала майдан» бикIуси шадлихъличир жигарла бутIакьяндеш дарни багьандан, баягъи ансамбльлис Ахъушала районна администрацияла шайзибад баркалла багьахъур. Илала къайгъни культурала бархбасуни уржахънилизи мягIничебси пайра саби.
ГIяхIлас далай-делхъла пагьмурти чедаахъиб «Ахъуша» ансамбльли, ХIузаймат Ибрагьимовани, Хасбулат РяхIмановли, Абакар Кьурбанадамовли, Хамис Мусаевани. Салимат Мусаадаевани «Дубуртала законти» бикIуси назму зайбухъахъун.
Фестивальла дазурбазиб, илкьяйдали ХIямшимала шилизи архIяра дураберкIиб. Ил ши машгьурси саби сунела тамашаласи тIабигIятличил ва культурала букьурличил. ГIяхIлас имканбакIиб шила тарихличил, мерличирти культурала ва тIабигIятла памятникуначил тянишбиэс.
«Ахъушала район» МО-ла багьахънибала шайчибси управление
