Рабадан ХIяжиев акIубси сай 1930 ибил дуслизив Урганила шилизив, хIурматла хъалибарглизив.
Рабада дудеш ЧебяхIси ВатIа дергълизи арукибсири, нешлис авал дурхIя абикьес чебуркъубсири. Илала дудеш дергълизив кIина вяхъили гIергъи сагъвиубли, сай ургъуси частьлизи чарухъунсири. Амма халаси замана архIебякьи лебалли, ил алхи сай ибси кагъар бакIиб илала хъалибаргличи.
Рабадан илхIели камти гIямрула урши сайри, амма ил манзилла цархIилти дурхIни кьяйдали, илис халати адамтачил цугли узес гIягIнибикибсири. Илини сунела виштIаси узис ва кIелра рузис дудешла мер буцили, нешличил варх узули, илди абикьахъес кумекбарибсири. Рабадай нешлис виубсигъуна кумекбирулри, мицIираг адилкьули, хъуми делгIули, сабухъ бурчули, арши иршули ва лерилра хозяйстволизир дирути хIянчилизив узусири.
1943-1944-ибти дусмазив Октябрьла революцияла уличилси канал бирухIели, Рабадан хандакьуни укъес вашусири. ЧебяхIси ВатIа дяви каберхурли гIергъира колхозлизив узули, Рабадай дахъал хIянчи дариб.
Илини Дербент шагьарлизир ца дусла бухгалтерла курсани делчIун. ГIур Буйнакъсклизир зоотехникла курсани тамандарили гIергъи, колхозлизив зоотехникли узули калун.
1953-1954-ибти дусмазив ВатIайс къуллукъбарес арякьун. Рабадан гIярмиялизивад чарухъи гIергъи Цугнила ва Урганила колхозуни декIардарибтири. Ил Урганила «Микоян» бикIуси колхозлизив бухгалтерлира узес вехIихьибсири. 1957 ибил дуслизир колхозуни совхозуначи шурдатурли гIергъи, совхозлизив парторглира узиб.
1960 ибил дуслизив Рабадан сунела шилизи кIел километрла кьадарла мерличи шин леркухIели, цIегъала турбаби даргес бажардиикибсири. Илини сунела шила халкьлис, шантас халаси кумек бирусири. Рабадан Урганила ва алавчарти шимала, махьурбала халкьла шайзивад баркаллаличи ва хIурматличи лайикьвикибсири.
Лерилра СирхIяла шими кадурхуси «Акушинский» совхоз Рабадай кIел совхозличи шурдатахъуртири («Акушинский» ва «Сургинский»). Илала гIергъи ил Цугнила шила Советла председательлира узули калунсири. ГIур пенсияличи арукьяйчи «Акушинский» бикIуси совхозла бекI бухгалтерли узиб.
Рабада хьунул жявли гIямрулизирад аррякьун (бунагь-хатIа урдуцаб сунела). Ил багьандан илис шел урши-рурси суненицун абикьес кьадарбиуб. Рабадай дурхIнас гIяхIси бяркъра бедили, багьудира касахъили, гIямрула гьунчи дураиб.
Ил «Тылла ветеран», «Бузерила ветаран» ибти умачи ва медальтачи лайикьвикили сай.
Рабадан ХIяжиев, Россияла Федерацияла Президент В.В.Путинна 2024-ибил дусла сентябрьла 2-личиб дурабухъунси ХIукму хIясибли, ЧебяхIси ВатIа дявила замана тыллизиб бузули, халаси бузери барибти, хандакьуни икъули калунти цархIилти адамти кьяйдали «1941-1945-ибти дусмазир ЧебяхIси ВатIа дергълизиб Чедибдеш сархибхIейчирад – 80 дус» бикIуси медальличил шабагъатлаварили сай. Илини гьар дус ЧебяхIси Чедибдешла БархIи РФ-ла Президент В.В.Путинна шайзибад Мубаракла кагъарра кайсули вирар.
Рабадан хIервирули сай МяхIячкъалализив сунела виштIалгъуна уршиличил ва илала хъалибаргличил варх. ДурхIнани ва илдачибад акIубтани дигиличил алавуцили сай, ва халаси хIеруди бирули саби. Рабадан ХIяжиев ишди бурхIназив 95 дус виубли, халаси шадлихъ барили, лебилра сунела тухумти цалабикили разивариб.
Илис чIумаси арадеш булгулра. Иш белкI хIядурбирухIели баянти дархьили кумекбарибси Урганила шила библиотекала заведующая Аматуллагь ХIяжиевас баркалла багьахъес дигулра.
С.ГIябдуллаева
