ХIусейнова ТIагьират Аюбовна акIубси сари 1920-ибил дуслизир Уллучарала шилизир, гIядатла хъалибарглизир.

ТIагьират ХIусейнова  ЧебяхIси ВатIа дергъла замана жагьил рурси сарри. Ил лебтасалра къиянси манзиллизир цархIилти дурхIни кьяйдали, тылла хIянчилизир рузули руиб, хандакьуни хIядурдарес рашули калун. ТIагьират Аюбовна «Тылла ветеран» ва «Бузерила ветеран» ибти умачи лайикьрикиб.

ТIагьиратла гIямрула вархкья Загьид ХIусейновра ЧебяхIси ВатIа дергъла бутIакьянчи, «Бузерила ветеран» сайри. ЧебяхIси ВатIа дергълизив гъабзадешличил ургъули, гьунарти дарни багьандан медальтачил шабагъатлаварибсири.

ТIагьиратла ва Загьидла урегал урши-рурси акIубтири. Амма илдазибад кIел биштIали лебалли алхунтири. Халаси бузери барили, авал урши-рурси  абикьурли, гIяхIси бяркъра бедили, багьудира касахъили, гIямрула гьунчи дураиб илдани.

Ца рурси малхIямси, духуси, сабурла СалихIят Загьидовна Ахъушала урга даражала цаибил школализир дахъал дусмазир учительницали рузули, дурхIначи ва илдала бегIтачи дигичерли, халкьла хIурмат сархили хIеррирули сари.

Ца урши  ХIяжи Загьидович тухтурли узули сай.  ХIяжи дебали гIяхIси уркIи-хIялла, малхIямси, тухтурла санигIятличи дебали валикибси адам сай. Ил Ахъушала районна больницала бекI тухтурлира узули калун.

СалихIят Загьидовнала рурси Лейла Кьадиевна нешлагъуна санигIятличил регIриубли, Ахъушала урга даражала цаибил школализир рузули сари. Жагали суратуни дируси,  пагьмучерси художникра сари ил.

Гьанна ТIагьират Аюбовна 105 дус риубли сари.   ТIагьират ХIусейнова хIеррирули сари МяхIячкъалализир, сунела виштIалгъуна уршиличил ва илала хъалибаргличил рарх, дигиличил ва хIерудиличил алавруцили.

Арадешличил, сунела дигутани, дурхIнани, илдачибад акIубтани  разирирули хIерриаб!

С.ГIябдуллаева