ХIебла ванаси бархIи КIишала «ЗурхIяб» ясли-анхълизиб, тяп школабазибван, халакабаибти дурхIнала кьукья гIямрула сагаси гьунчи – школализи – гьуниббатур.
Илди 27 урши-рурси лебри, сабира воспитательти Р. Шамхаловани ва Р.БяхIяммадовани гьар бархIилати къайгънауб бяркъличи бикахъибти.
Ясли-анхълизиб хъумхIертеси шадлихъ сабри. Ила 75 дурхIя, илдачил бузути мугIяллимти ва воспитательти, бегIти, дурабад бакIибти гIяхIли цалабикилри.
Балбуцлис бекIдеш дирулри ясли-анхъла заведующий ГIяхIмад Ибрагьимовла заместитель Сапият МяхIтIуевани.
ДурхIни разибарес музабухъири «Дахадаевла район» МО-ла бекI МяхIяммад ГIябдулкьадиров, культурала отделла начальник Рабазан ХIясайниев, багьудила управлениела начальник ГIябдулла ГIялиев, КIишала урга даражала школала директор Рабазан МяхIяммадов, КIишала дахъал шалубар гимназияла директор Рабазан Кьасумов, шила администрацияла ва библиотекала хIянчизарти.
— Гьанна нушачи жибирехIе ясли-анхъла выпускникуни! – балбуц бузахъуси Райгьанат Шамхаловани.
ХIера, актовый заллизи жагали балкьаурти уршби-рурсби абацIиб. Илдас актовый заллизибти лебтанилра хъутри дяхъиб. Илкьяйда дурхIнас гьунираиб бехIбихьудла классунала учительница Райгьанат МяхIяммадова. Тяп илни кьабулбирути сабри никIа уршби-рурсби бехIбихьудла цаибил класслизи.
— Иш гьунибаънили наб дила дурхIядешра гьандикахъиб, — викIи районна бекI М.ГIябдулкьадиров. – Бархьил, итхIели ишхIеллагъунти шуртIри аги дурхIнас: я багьудилашал, я бяркълашал илди тамай балкьаахъести тяхIурти аги. Сен или викIулра? Гьанна иш ясли-анхъла дурхIни, бучIес-лукIес бурсикабиубли, вайсира-гIяхIсира дагьурли, школализи аркьули саби. ТалихIла биаб багьудлумачи илдала сагаси гьунира!..
Багьудила управлениела начальник ГI.ГIялиевра лехIкахъили уэс хIейуб:
— Ну вирхулра ясли-анхъла дурхIнани школализибра чула мер бургниличи. Хъярхъли шалгIердулхъан дусмира, багьуди-бяркъличи бикибти ахIмакь адамти бетарар ишхIелила дурхIнира. Илдани нушала пачалихъла даража ахъбуцес икьалабиру…
ДурхIнани чула шадлихъ назмуртачил, далуйтачил, делхъаначил, жура-журала цархIилти ихтилатуначил бемжахъур.
Сецад дигулихьар, ил бархIи дурхIни гьуниббатес ва гIяхIлачил гьуниваэс ясли-анхъла заведующий ГI.Ибрагьимовлис имканхIебакIиб: дахъал дусмазиб кIишантала дурхIначи хIеруди бузахъуси ил багьадур гьанагарси изай заманалис больницала койкаличи чекавцили ветаур. Лебилра гIяхIлани, илис арадеш булгули, ванати дугьби ва мубаракуни дуриб.
Ибрагьим Ибрагьимов
