…Хъули рухIнарухъи, телевизор улкахъулра ва чебиулра «Поле чудес». Пикрирулхъулра: «Дагра лебригу икI передача, ишбархIира сен бирусира?» Чис хабарри ил анцIбукь дагла ахIи, ца жумягI гьалабла биъни ва верхIел бархIира ца бархIиван хъярхъли шалгIердухъни!
Илдигъунти сари адамла гIямру, илгъуна саби замана!!! Ца-кIел дус гьалаб бетаурсиван билзули кьалли районнизи сагаси прокурор вакIнила хабар аргъили, ГI.ГIялимяхIяммадовра нура иличи гьардакIибхIелла анцIбукь. Мирзакьади Кьасумович нушаб разили гьуниваибсири, гIяхIси ихтилат бетаурли, газеталичил уржибси бархбас бузахъес саби дила пикри или бурибсири.
ХIера, илхIейчирад вецIал дус ардякьи дуили сари! Ил заманала духIнар чумилра газетала бяхIяни хасдарили детаур районна прокуратурализирадти белкIанас. Халкьлизи законтала тIалабуни аргъахъес, такьсирчидешла анцIбукьуназибад мяхIкамли буахъес, хаслира экстремизмала, терроризмала балагьуназибад, наркотикуназибад жагьилти ва дурхIни мяхIкамбарес багьандан хIядурдарибти белкIани сарри илди, прокуратурала хIянчизартала ва прокурорла уличил дурадулхъути.
Законтала тIалабуначила газетализи белкIниличибли таманбируси ахIенри прокурорла хIянчи. Мирзакьади Кьасумовичли бутIакьяндеш дирутири районна кьадрила далдуцуначир, гьунибаънибачир, районна администрацияла, АТК-ла ва АНК-ла комиссиябала заседаниебачир, ОМВД-лизир детурхути совещаниебачир.
Бурес вирар вецIал дусла духIнар районнизирти тяхIяр-кьяйда, хаслира районна бекIдешличи ГIябдулкаримов МяхIяч Кьадиевич вакIили гIергъи дебали ункъдиуб или.
— Жагьил адам виалра, жавабкардешличил шикьикIуси, районна даража гьар шайчибад ахъбуцес къайгъилизивси руководитель сай МяхIяч Кьадиевич. Ил кумек гIевуцес кьаслизивра,— бурибсири цагьачам сунечилси ихтилатлизиб Мирзакьади Кьасумовичли. Сунени дурабуркIуси хIянчиличила белкIахъес къалабахIейкиб, «Замана лябкьян, гапдарести дахъдаибхIели лукIехIе!» — или гъай масхараличи шуркадалтули.
ВецIал дусра дикили, сунес чебаахъибси заманара беркIили, районнизивад аркьули увухъун. Илгъуна хабар аргъибмад арицIулра прокурорла кабинетлизи.
— Гьанна белкIес асубирар газетализи! Ахъушала районна халкьли ну иткьяйдара вагьурра, дила Хайдакьла районнизиб багьахъес, секьяйда хIянчи барирал ишаб белкIес рируд! —пиширхъули сай мурталра кьяйдали, сунечи ухIнаухъунсилис дяхI шалали гьунивиуси Мирзакьади Кьасумович.
Нуни чила сабрил ишгъуна пикри белчIунсири: «Прокурорли узуси адам, эгер ил гьарли-марси прокурор виалли, илала дуравад виэс гIягIниси сай философли, психологли ва хIятта тухтур-невропотологлира!»
Илди гъай гьандушили, имцIабарира: «Илгъуна пикриличи, Мирзакьади Кьасумович, хIела хIянчила тяхIяр-кьяйда далдикибтази дейгIес хIейрару, адамтазир гIяхIтицун гьанбикуни калахъи аркьули увулхъулригу районнизивад!»
— Гьайгьайрагу, ил дебали ахъси кьимат саби. Илгъуна кьиматличи гъамиубли виасли — дила халаси игъбарлизи бейгIес вирус! Ил игъбарлис бехIбихьуд биалли наб дила дудешли кабихьибси саби, — жаваб гиб М.Мирзакьадиевли.
Илала чебкад чебетаахъили бурахъес тиладибарибхIели, прокурорли иб:
— Юристла диплом касили, узес вехIихьибхIели, дила дудешли, бунагь-хатIа урдуцаб сунела, ибсири: «ХIела хIянчи, урши, адамтала кьисмат ирзниличил бархбасунси бетарули саби. Ил багьандан мяхIкамли вии! ХатIахIейкес къайгъибара, адамти декIармабирид! Аргъа муртлисалра — эгер хIяким агьлулис, ахърила бегIтас гIяхIъулавирули, гIядатла адамти кьакьабикIахъадли — хIу дила урши ахIенри!» Дудешли дахъал гIямру хIедеркIиб, урегцIали дусра ца базра дикибхIели гIямрулизивад арякьун. Илала дугьби биалли, дила уркIилизир даимлис калун. Аллагьличи шукрувикIулра дудешла аманат таманбарахъес набзи гIякьлура сабурра гибнилис!
М.Мирзакьадиевлизи, чидил районнизи узес шурулхъулри или хьарбаира.
— Гьачамлис бамсриахъес пикри саби. Бархьли бурасли, авцIали дусла бузерила гьунили вамсахъурсиванра, хаслира гIергъити хIябцIанну хIябра дус декIар-декIарти мераначиб барибси прокурорла хIянчили. Асубирар, хъулиб анцIбукьалли, се-биалра пикрибарес. ДурхIначил, илдала биштIатачил замана беркIес биркниличи разилира.
УркIиличи бакIиб ца адамли бурибсира: «Мер-мусала чебкад унраличил жал бетаурхIели прокурорли ну сунечи живарира. ВахъхIи гъайикIули калун, законтачила аргъахъиб, дубурлантала тяхIяр-кьяйдаличила гьанбушиб. Ахирлизиб иб: «Жалтира дати, гIярзхIебикIахъули унрубира бихIен, хIела хъали-цIара жяв-жявли далкьаахъурли, хъалибарг ца бархIи гьалаб биалра ила гечбарес къайгъибара. Гечла хинкIачи нура живараба…»
Прокурорла илдигъунти гIякьлумани ну хIябилра пикриухъахъунра. Сай ишав левалли хъали-цIа бекIдарес валкьхIеурра, валкьаурмад — багьахъес кьас саби!»
…Чумал бархIила гIергъи районна администрациялизиб бетурхуси активла собраниеличив Мирзакьади Кьасумович заллизи цалабикибтала гьалав гъайухъун, вецIал дусла бузерила гьунчив сай гIевуцнилис баркалла багьахъур, гьарилла уркIилизир калести гъай дуриб.
— БекIлил хатIахIеркусира чилра хIергар, прокурор лебтасалра гIяхIси ветаэсра хIейрар. Дила уркIилизиб разидеш саби вецIал дусла бухIнаб халкьла гьалав урузвиэси баркьуди набзибад кахIебикниличи.
Активла собраниеличиб гъайбухъунтани Мирзакьади Кьасумовичлис баркалла багьахъур, ара-сагъли, дурхIначибад акIубтани харивирули хIервиэс кьадарбиаб хIед или буриб.
…Майла 9-личиб Ахъушаб Чедибдешла БархIила байрам сабри, бахъал лебри районна центрлизи цалабикибти адамти. Аргъеслири, районнизиб сецад хIурмат сархили аркьулрил Мирзакьади Кьасумович, — чебиухIели, севан къалабабиркулрил байрамличи бакIибти прокурорличил барх сурат касахъес.
П.Маллаева
