Адамла гIямрулизирван библиотекала гIямрулизирра халатира диштIатира анцIбукьуни дирути сари. Ишди бурхIназир, Бускрила шила библиотека абхьибхIейчирад 70 дус дикнила юбилейла байрам дураберкIиб. Байрамличи жузи дучIанти, шанти, хIурматла гIяхIли, шими-ургабси библиотекабала кабизла хIянчизарти, школала учительти цалабикиб.
Библиотекала тарих ЧебяхIси ВатIа дергълис гIергъиси 1946 ибил дусличибад бехIбихьили саби. 70 дус, гьарли-марли, камти ахIен. Библиотека абхьибхIейчирад ишбархIиличи бикайчи детаурти дарсдешуначила буриб бехIбихьудла классунала учительница Барият Маматовнани. Гьаланачи библиотека (изба читальня бикIусири) МяхIяммад Расуловла ва Кьади ГIяммаевла вегIдешла юртаназиб мерлабиубсири. Библиотекала цаибил заведующий сайри ГIямар ГIялибеков. Илала гIергъи чумал хIянчизар барсбиуб.
ГIябидат МяхIяммадова дахъал дусмазир 1969 ибил дусличирад рехIрихьили 1999 ибил дусличи бикайчиси манзилла рухIнар, библиотекализир рузули калун.
2000-ибил дусличирад рехIрихьили, ишбархIира Рази МяхIяммадова библиотекала заведующая сари. Илини гьаланачи Бускрила урга даражала школа белчIун, 1988-1991-ибти дусмазиб культурала училищела библиотекабала отделениелизиб багьуди касиб. Сунела хIянчи ункъли балули сари, шила халкьла ва библиотекабала кабизла хIянчизарти-ургар хIурматличил пайдаларикIули рузули сари. Бускрантас библиотека саби гьаббакIес дигахъуси мерли бетаахъурли сари.
Дахъал дусми ардякьи диалра, ил акIахъубти бурхIназибван, гьаннара библиотека халкьлис гIягIниси, дигахъуси культурала учреждениели кавлули саби. Дусла духIнар бучIути дурхIначил ва халатачил декIар-декIарти далдуцуни библиотекализир дурадуркIули дирар. БучIутани республикала даражала ва районнизир детурхути конкурсуначир бутIакьяндеш дирули саби.
Библиотека, халкьлис дигахъуси мер саби, илабси багьа агарли дурхъаси хазна, сунела чебяхIдеш – Жузличил гьалмагъбикес бускранти мурталра башули саби.
Гьарил юбилейличирван, мубаракунира, савгъатунира, балгунси кьуммурра, далуйти делхъанира Бускрила библиотекала юбилейличирра лерри.
Дахадаевла районна шими-ургабси, бекIлибиубси библиотекабала кабизла директор Залина МяхIяммадовани библиотекала юртлис сагати, гьаннала заманаличи далдикибти улкьайти кадатахъес сунечи чесиб ва библиотекалис гIурра дахъал дусмазиб сархибдешуначилси бузери, бахъал бучIанти, дахъал гIяхIти жузи диубли дигниличила буриб.
ХIядурбарибси — М.Хаттаева
