Хайдакьла районна Санчила шилизивадси старший сержант Шамил МикагIилович Пашаев, дявила хасси балбуцлизир гъабзадеш дакIударни багьандан, «Гъабзадеш багьандан» медальличил шабагъатлаварили сай.
2012 ибил дусличирад илини ВатIайс мардеш чедиахъули, вягIда бигьи, гIярмиялизиб къуллукъбирули сай. Бузериличи, низам-кьяйдаличи чекайзурси гIяхIгъабзали сунечи хъардарибти къуллукъуни халати жавабкардешличил хъарарахъули сай.
Шамил Пашаев акIубси ва халаваибсири сай Санчила шилизив. Илаб таманбарибси саби ургала даражала школара. Дагестанский Огни шагьарла 3-ибил санигIятлашалси лицейлизиб белчIуди даимбируси замана, сварщикла санигIят руркъули, илини сунела гьала тIашдатурти мурадуни сархес гъирачевси студент сайливан чебаахъиб. Шамилли спортлашалти далдуцуначир ва олимпиадабачир жигарла бутIакьяндеш дири. Лицей таманбарибхIели, Шамилли, Хайдакьла районна дявила комиссариатла направление хIясибли, водительла санигIят кайснила шайчир багьудлуми чедицIахъиб ва гIярмиялизи арякьун.
2012 ибил дуслизиб хъя (присяга) кьабулбарили гIергъи, Нижегороская областьла Саров шагьарлизиб къуллукъбирули гехIел баз дикибхIели, Росгвардияличил вягIда бигьун, илаб хасси хIядурдешра бариб. 2021 ибил дуслизив ил Владимирская областьла Муром шагьарлизи шурватурсири, 2022 ибил дусла февральла 11-личиб биалли, илини къуллукъбируси подразделение Украинала мер-мусаличи бархьибсири.
Дявила хасси балбуцла цаибти бурхIназивал Шамил Пашаев урехиагарси ва бирхауди бихьеси ургъан кьяйдали вяшикIи. Илини чуйнара душма хIярхIубауб, гьаларти къяяназибадти бяхъибти гечбариб. Дявила хъарбаркьуни урехиагардешличил детурхахъни багьандан, илис пачалихъла шабагъатунира дедиб. Илди-ургар лер: «Гъабзадешлис» орден, «Инженерный бяхIчибизлизиб гIеббурцнила шайчирти хъарбаркьуни тамандирухIели, къайгъи дакIубарни багьандан», «Гъабзадеш багьандан», «Дявилизив декIарухъни багьандан», «Дявила хасси балбуцла бутIакьянчис» бикIути медальти.
Шамил МикагIиловичлис дявила анцIбукьунала ветеранна у бедибси саби.
Хаслира пикри бяхIчиаэс чебиркур Курск шагьарла мер-мусаличиб кабикибси ца анцIбукьличи: миллатчибала хIярхIубала гьужумлиуб Шамил Пашаевли къуллукъбируси подразделениели хIеркIла чедибад бетахъбиркахъес хасси мер балкьаахъурлири. Илдала гъабзадешла кумекличил Россияла подразделениебас шинна гьалабиз ахъес ва душман гIелавяхI дянгаэс имканбакIиб.
ИшбархIира Шамил Пашаевли ВатIайс марли къуллукъбирули сай. Илала гъамтании – хьунул Заринани, бегIтани, узбани ва рузбани – иличи пахрубирули саби, ил жяв-жявли хъули ара-сагъли ва чедибдешличил чарулхъниличи бирхули саби.
«Нуни халаси пахрубирулра муруйчи. Командованиелира илала баркьудлуми чихъли кьиматладирни балулра, сенахIенну илини сунечи хъарбарибси жавабкардешличил бетурхахъухIели», — бурули сари Заринани.
Шамил Пашаевла Чедибдеш сархайчи ургъес, ил гъамбиахъес сунени вирусигъуна барес ибси чIумаси кьас леб.
Хайдакьла районна администрацияла пресс-служба
