Хайдакьла районна ГъярацIанила шилизивадси хасси дивизионна фельдшер, старший прапорщик ГIябдуряхIимов Запир ХIямиевичли РФ-ла Ярагъладарибти ЦIакьаназиб вягIда хIясибли къуллукъбирули саби.
Илини бутIакьяндеш дарибти сари Чечнялизир ва Сириялизир кадикибти дявила анцIбукьуназир. 2022 ибил дусла февральла 28-личирад биалли, илини дявила къуллукъуни тамандирули сари Украинализиб бетурхуси дявила хасси балбуцлизир.
Гъабзадеш дакIудирули, дявила тухтуртани гьар бархIи ВатIан батахъес ва бархьдеш кабизахъес или дурабухъунти Россияла бахъал бургъантала гIямру уцахъули сари. Тухтурти ва фельдшерти СВО-ла дявила анцIбукьуни кадиркути гьаларти къяянази арбашули саби, ва дахъал уъ-муъ агарли, чули дарес хIяжатти хIянчи гIягIниси тяхIярли гьунчидиркахъули сари. Илдала къайгъназибад дигахъуси саби бургъанти стройлизи чарбулхъанал.
Старший прапорщик Запир ГIябдуряхIимовли гьачамцун ахIенри душма хIярхIубауб дявила юлдашунас медицинала цаибси кумек гIеббаахъибси ва кIинайс илди урехиагарси мерличи гечбирути. Илини илкьяйдали уршбас кумекбирули саби дявила майдайчиб, бургъанти стройлизиб калахъи, дявила хъарбаркьуни детурхахъес даимбиахъес багьандан.
Россияла бургъантала гIямру мяхIкамдирахънилизир дакIударибти санигIятлашалти устадеш ва гъабзадешла баркьудлуми багьандан, Россияла Федерацияла Президентла ХIукму хIясибли Запир ГIябдуряхIимов 2023 ибил дуслизив «ГIямрулис урехи акIубти берцахъни багьандан» бикIуси пачалихъла шабагъатличи лайикьвикиб.
Илкьяйдали гIяхIгъабзала лер цархIилти шабагъатунира: 2018 ибил дуслизиб илис бедибсири «Дявила къуллукъуни таманадирнилизив декIарухъни багьандан» III-ибил даражала, 2020-ибил дуслизиб – «Сириялизиб бетурхуси дявила балбуцла бутIакьянчис» бикIуси, 2021 ибил дуслизиб – «Дявила къуллукъуни тамандирнилизив декIарухъни багьандан» II-ибил даражала, 2023 ибил дуслизиб «СВО-ла бутIакьянчис» бикIуси медальти. Илкьяйдали леб илала жамигIятла шабагъатра – 2024 ибил дуслизиб бедибси «Дагъиста халкьла игит» медаль.
Хайдакьла районна администрацияла пресс-служба
