ИшхIелла манзиллизир ва гьаларти дусмазир улкалис къияндикибхIели илала хъархIерагардеш балтахъули, нартаниван дявила майдайчи душмайчилси гъазализи дурабулхъути бахъал багьадуртала хабардерхурти сари. Илдигъунтала лугIилизивадли сай Дахадаевла районна КьярбачIимахьила шилизивадси ургъан Мурад БяхIмудовра. СВО-лизир бутIакьяндеш дирули, илини игитдешла баркьудлуми дурадуркIули сай ва сунечил бархт бургъутас гъабзадешла мисалли ветаурли сай.
Илала дявила гьуни бархбасунси саби сунела Украинализибси Северный Донецк ибси хIеркI ихъуси замана юлдашуни берцахъес музаухъунхIели алхунси узи Кьурбан БяхIмудовла кьисматличил.
Алхунси узила гьуни даимбарес или, 27 дус виубси Мурад, бегIтазира хIебагьахъурли, СВО-лизи арякьунсири. Сунела узила игитти баркьудлумачила гьанбиркахъулицунра ахIи, сирхIян уршили ВатIа хъархIерагардеш батахъес хIяжатли биъниличилара ункъли иргъули сай.
Дявила майдайчир ишхIелла манзиллизир Мурад БяхIмудовли, ВатIайс марси ургъан сайливан, гьунарти чедиахъули сай ва юлдашунас кумекличи музаухъес мурталра хIядурли сай. Къиянти аги-хIяйзиб чуйнара илини сунечил бархти бургъантас кумек гIеббаахъиб. Илдигъунти баркьудлуми пикрила дурар кахIелун ва командованиели илис Жуковла уличилси медаль бедиб.
Узби БяхIмудовхъала баркьудлуми неш-ВатIайчирти уркIи-уркIиларадти дигила ва илис мардеш дирнила гIячихъси мисал саби. Ишди къиянти бурхIназир илдигъунти ВатIайчи кахIедурхути диги, узидешла хIялани ва юлдашуни багьандан гIязиз жан ахIерахIедирни чеалкIуси наслу гъабзадешла гьундурикад гьалабяхI башахъес багьандан зурбаси цIакьли детарулира сари. Сунела узи Кьурбайчила адамтани даимлис гьанбиркахъниличи вирхули, Мурад цархIилтас мисалли ветаурли, гьунартала баркьудлуми дурадуркIес даимиубли сай. Сунела уркIилизиб савлила шалдаван алки узила сипат бархли саби Мурадличил. Илгъуна чебяхIси шалали адам бархьси гьунчивадли чевхIелкIахъа ва игитти баркьудлуми дурадуркIахъес багьандан гъирачеввирахъу.
Мурадличи хъулиб нешра дудешра хIерли саби ва чедибдешла хабарличил ил чарулхъниличи бирхули саби. Гьардизаб илдала ва лебил гIялам халкьла чедибдеш жяв-жявли сархниличи умутуни ва хьулани.
Дахадаевла районна администрацияла пресс-служба
