Адулкахъа зубарти
Дай дугила заклизир,
Адамла уркIиларти
ЗурхIябла рангла нурли.
Ургубакад къунзухъи, вавнала хала бучес вализалли, адамли бегIлара жагати вавни чердиркIули вирар. Халализир дахъал рангани диубцад илини адамтала пикрумира имцIали дитIикIули дирар.
Тяп илкьяйдали жагати вавнала халаличи мешубиркули саби ишхIелла манзиллизиб «Замана» газетала редакцияла коллективра. Даргала районтала декIар-декIарти шимазибадти жагьти уршби-рурсбала авид илгъунали биэсра хIяжатсигу. Илкьяйдалира сунела пагьмурти бегIлара вавалидяхъибси жагьти гIямрула редактор ГIябдуряхIман ИсмягIиловли бекIдеш дирули сай бусягIятла замана редакциялис. Бархьси саби, чумал дус гьалаб редакциялизиб бузули бири дахъал дусмазир бузерила устадеш давлачердиахъубти пасихIкарти журналистуни. Илдала дурсри ишхIелла манзиллизиб бузути жагьилтани гIерасили сари ва газета республикализибра гьалаб кьяйда гьаннара бегIлара гIяхIтигъунтала къяяназиб биахъес къайгъилизиб саби. Ил мягIничебси санигIят ламусличил бузахъутазирадли сари бекI редакторла заместитель ПатIимат Сулайбановара.
Уруз-хIяцIли, ламус-хатирличил ва сабурличил гъайрикIуси, дяхIличир берхIила нур ухуси, паргъатти хIял-тIабигIятла ва гьарил дев пикрирухъи буруси рурси «Замана» газетала уржибси къушумлизи рузес ракIибхIели, газетализибкIун бузери гьалакбирес хIяжатси саби, бажардирикесара ил или гьанбикибсири наб. Амма ил макьалаби лукIескариибхIели, дила илгъуна пикри хатIаласи биъни аргъира. ПатIимат Сулайбанова дебали гIякьлучерси, бехIбуцибси гьарил баркьуди чебетаахъили ахирличи бикахъес къайгъилизирси, пагьмучерси журналист сарли уррухъун. Илала хасиятуназибадли наб бегIлара гIяхIбилзуси уркIила хIялалдеш ва бархьдешла дякькад умутличил ганзрикIни саби. Илгъуна адамли чисалра гьачамалра ламарт хIебиру, къяна-шилтахъ гьарахъли далта, адамтачирти дигила асарлиур багалати баркьудлуми дурадуркIес къайгъни дакIудиру. КъантIли буралли, нушала ПатIимат чис-биалра гIяхIдеш барес бикалли, разити хIяланази гIелариркур.
ПатIимат Сулайбановала газетабазир ва журналтазир дурадулхъути макьалаби дучIухIели, ил адамлис гIяхIдеш булгуси, пергер адамтала баркьудлуми цархIилтас гIибратли диэсли учIаннис гьаладирхьуси ва сунела санигIят хьулчидан ункъли бяркъурси лукIан риъни багьесли саби.
Нушала къугъаси авидлизиб урегал ПатIимат леб бузули. Илдас ва цархIилти хIянчизартас гIибратли ретаурли, ил чекаризурли рузуси сари ва камси заманалисалра акьули чераэс хIейрар. Хамдеш-халадеш агарси ил дубурлан рурсили журналистла санигIят чеббикIнира тамашабизесил анцIбукь ахIен. Ил дубуртани ряркъурси гьарли-марси дарган рурсила уркIи-рухIлизи минадиубли пагьмуртала урунжуни чIянкIли сунела пергер белкIанала кумекличил сари парчдикIути. Илдигъунти черяхIти пикруми ва кьасани, адамличи дигили рурхIахъути бетуцуни уркIилизир дихIес гьамадли ахIен. Илди ванзализирадли дурадухъес или рурхъути магмала варачантачи мешути дирар. ВегIла дагьрилизир умударили ва каргьахъурли, къугъати пикруми кагъарла кIапIилизи хIурпрала журализир якьутла кIунтIриван кайгахъули сари нушала ПатIимат Сулайбановани. ГIе, ил гьамадси хIянчи ахIен. Амма хIурматличил пайдалавикIуси журналист министрличивра банкирличивра гIяхIцадла гьалав вашуси хIянчизар сай викIалра, хатIа бетхIерар. Устадешличилси лукIанна дев цацахIели гъургъашинна хIярхIяличибра мурхьли алтIули бирар. Дирар анцIбукьуни журналистла, поэтла яра писательла девли тухтурла дармунталайчибра асар халаси бирути.
Ахъушала районна ХIерхмахьила шилизирадси къугъаси хъалибарглизирадси ПатIиматла хIебла вавнигъунти урши-рурсира леб. Илдира нешгъунти адабчебти ва пагьмучебтили халабиъниличи вирхес вирар.
ХIеблара дуцIрумлара ургабси дунъя азир рангла вавнази гIелабикибси ва арцантала къугъати макьамтани зайбикIахъуси лебгIеб гьайбатси манзиллизир акIубси сари нушала ПатIимат. Илди тIабигIятла кIел манзилла азир рангла зурхIябти цаладиркуси замана акIубхIели рургар ил илцадра малхIямси, гIякьлучерси, пасихIкарси… Илкьяйдали акIубси бархIиличил бархбасахъи, «Замана» газетала балгунси коллективли, ПатIимат, уркIи-уркIиларадли хIу мубаракрирулри. ХIед, хIела узи-рузис, урши-рурсилис, гъамти-тухумтас ва шантас арати гIямру, кахIебурхуси талихI, бузерилизир гьарбизуни, гIямрулизиб баракат диубли дигулра. Рузи ПатIимат, гьаннала гIергъира умутличил гьаларяхI ганзрикIен, пергерти макьалабачил газета бучIанти разибирен… Гьанналаур деркIибти дусмицад гIурра кIиркали гIямру хIед дигусиливан къулайли деркIаби, дурхIнала гьарбизунани мурталра разирираби, гьарил хIела гIяхIси пикри бетурхули, хIулкIули калаби!
ПатIимат Кьурбанова
