Булатова Малика Булатовна  акIубси сари Ахъушала шилизир. Гьанна Малика урегал дус риубли сари. Ишдус ил школализи рукьес хIядуррикIули сари. Маликала неш Умукусум Булатовара дурхIнала анхълизир рузули сари. Маликара сунела нешличи мешуси, къугъаси, духуси, пагьмучерси рурси сари. РиштIали хьалли, илини назмурти уркIиличир дурес, жагати далуйти дучIес, суратрикIес, пластилиннизирад жура-журала ваяхI дирес балули сари.

Ишдус ЧебяхIси ВатIа дергълизиб Чедибдеш сархибхIейчирад 80 дус дикнилис багъишлабарибси шадлихъличиб Маликани, дявтас хасбарибси далай зайбухъахъи, байрамличи цалабикибти тамашабиахъуб. Малика Ахъушабадти ЧебяхIси ВатIа дергъла бутIакьянчиби ГIябдуллагь Булатовла ва МяхIяммад ГIямаровла хIябэсил наслулизирадси сари, бунагь-хатIа урдуцаб чула! Гъабзадешличил ВатIа хъархIерагардеш батахъес, чеабиуси наслулис даршудеш биахъес багьандан дявтазиб бургъули калунти сабри.

Маликани, илкьяйдали, дурхIнала анхълизир детурхути шадлихъуназирра жигарла бутIакьяндеш дирули сари, назмурти дурули, далуйти дучIули, жура-журала хIязани, суратуни дирули.

Илала неш Умукусумли сунела рурсила пагьмурти имцIадиахъес, илди гIердуцес къайгъилизир, гIяхIси бяркъра бедили арилкьули сари.

Аллагьли Маликас ва лебилра биштIатас игъбарла, даршуси челябкьла кьадарбараб, кьисматуни ва пагьмурти имцIадикIули, разидешличил хIербиаб!

С.ГIябдуллаева