Май базра кабурхули саби, школа таманбирутала имтихIянтира чесадаили сари, имтихIянти агарти классунала дурхIни каникултачир се бирехIел, чина аркьехIел или разити пикрумазиб саби. Набра гьандикиб школализир ручIухIелила гIямру, хаслира чедирти классуназирти имтихIянти, гIергъити зянкъла бархIиличи хIядурдешуни. Итди разити бурхIни гIямрулис хъумхIертис или гьанбиркур. Ну илди пикрумазир лерли, Дегвала шилизирадси ца школала ручIанничила набзи хабар буриб. Ил рурсиличил тянишриэс хьулрухъунра. Гьанна хIушазира ил ручIанничила бурулра.
ГIямарова Жамиля Суменовна ручIули сари Дегвала урга даражала школала 11 ибил класслизир. Илини цаибил класслизирад рехIрихьили шула кьиматуницун кайсули школа таманбирули сари. Жамиляни районна ва республикала олимпиадабачир бутIакьяндеш дирули, гьаларти мерани дурцули рирар.
Арбякьунси дуслизир Жамиля ГIямарова МяхIячкъалализиб дурабуркIуси «Живая классика» конкурсличир лауреатла грамоталичи лайикьрикиб, ил хIядуррарибсири, Дегвала школала урус мезла ва литературала учительница МяхIяммадова Нарипат Шейховнани. Камли ахIен ункъли бучIути дурхIни, Жамиля илдазирад сунела сарерхурдешличил, халкьлис кумекбирес гьалакдешличил, гIяхIти хIял-тIабигIятличил ва школализир дурадуркIути лерил далдуцуназир бутIакьяндеш дирниличил декIаррулхъули сари.
-Сегъуна факультет чеббикIес пикри леба? – хьарбаира нуни Жамилязи.
— Халкьани-ургарти бархбасунала шайчибси факультет чеббикIилра, – рикIар ил.
— Сен илгъуна санигIятличи регIриэс хьулрухъунсири?
— Наб халкьани-ургар даршудеш, узидеш, балгундеш диубли дигухIели, — жаваб чарбатур илини.
Камти гIямрула жагьси рурсила кьас наб тамашабизур. Улкализир паргъатти, даршути гIямруличи хьулличилси, гьарли – марси патриот руилигу Жамиля.
ДурхIнала баркьудлумачи ва хIял-тIабигIятличи хъалибарглира халаси асар бируси саби. Жамиляла дудеш — ГIямаров Сумен ХIясанбекович историяла дурсрала учитель сай, неш — ГIямарова Рашидат ГIялихановна психолог сари. Педагогунала хъалибарглизир халараибхIели риэс Жамиляра илгъунали ретаурси. Баркалла биаб бегIтас, рурсилис илгъуна гIяхIси бяркъ беднилис.
Жамиляс гIямрулизир талихI, арадеш, гьарбизуни ва белчIудилизир сархибдешуни диубли дигулра.
Басират ХIяжимурадова
