Зайпадинов ГIябдуллагь Зайпадинович бехIбихьудла классуназив учIухIелил  жура-журала конкурсуназир  бутIакьяндеш дирес вехIихьибсири. Илини халаси назму гьачам-кIина белчIалли, уркIиличиб балули сай.

ГIябдуллагь учIули сай Ахъушала урга даражала  цаибил школализив, гехIъибил класслизив. Школализив ил ункъли учIули, гIяхIти кьиматуни кайсули сай.

ГIябдуллагь школала, культурала, туризмала, багьудила управлениебала шайзивад ХIурматла Грамотабачил, Дипломтачил, Баркаллала  кагъуртачил  шабагъатлаварибси сай, школала гIямрулизир ва районна духIнар детурхути конкурсуназир жигарла бутIакьяндеш  дирни багьандан.

Илини ишди бурхIназибра, ЧебяхIси ВатIа дергълизиб Чедибдеш сархибхIейчирад 80 дус дикнилис багъишлабарибси шадлихъличиб, бургъантас хасбарибси назму жагали белчIун.

Илкьяйдали, республикала кьадрила жура-журала  конкурсуназирра ГIябдуллагьли бутIакьяндеш дирули  сай ва гьаларти мераначи лайикьвиркули сай.

2021 ибил дуслизив ДАССР акIахъубхIейчирад 100 дус дикнилис хасбарибси «Соцветие» бикIуси республикала кьадрила Дагъиста поэтунала назмурти  дучIнила шайчибси, районна бухIнаб бетурхуси  конкурсличиб чедибдеш сархибхIели, илис багьудила управлениела шайзивад ХIурматла Грамота бедибсири. МяхIячкъалализив 2022 ибил дуслизив ил конкурсла лауреат ветаурли, хIябъибил мер касиб ва ДИРО-ла ректор Г.А.ГIяхIмадовани Диплом бедиб.

ДР-ла культурала  Министерствола шайзивад  Дипломличи лайкьвикиб «Дагестан – моя любовь и моя клятва» бикIуси МяхIячкъалализиб школабала бучIанти– ургаб бетерхурси конкурслизиб цаибил мер сархили, ил конкурс ДАССР акIахъубхIейчирад 100 дус дикнилис хасбарибсири.

«На родном Кавказе мирно жить» бикIуси районна  культурала КIялгIялизиб бетурхуси фестивальлизирра  жигарла бутIакьяндеш дариб, жагали назмурти  делчIун.

5-ибил класслизив учIухIели «ЧебяхIси Чедибдешла букьурти» бикIуси, ЧебяхIси Чедибдеш 77 дус биънилис  хасбарибси республикала кьадрила районнизиб  бетурхуси конкурсличибра гьалабси мер сархибсири. «Халкь бахъал – улка ца»  бикIуси конкурслизир бутIакьяндеш  дарнилис Дагъиста  машгьурси поэтесса, «Лачин»  журналла бекI редактор Аминат ГIябдулманаповани сунела назмуртала жузра, Баркаллала кагъарра дедибтири.

«Лебтасалра ца» бикIуси ЧебяхIси Чедибдешлис  хасбарибси конкурслизир заочно бутIакьяндеш  дарнилис Диплом сархиб.

2021 ибил дуслизив «Халкь бахъал – улка ца»      бикIуси конкурсла финалист ветаурхIели ДР-ла  Миллатла политикала ва динна шайчирти къуллукъуни  дузахъуси Министерствола шайзивад Дипломличил  шабагъатлавариб.2022 ибил дуслизив «Живая классика» бикIуси дурхIнани назмурти дучIуси лебил Россияла, республикала кьадрила ва районна конкурсла  лауреатра ветаурли «Живая классика» Фондла Президент Мария Смирновани Дипломличил шабагъатлавариб, «Ахъушала район» МО-ла администрацияла багьудила управлениела  начальник МяхIяммад КаримхIяжиевли Грамота бедиб.

Илкьяйдали, ГIябдуллагьли халкьани–ургабси  «Палитра культур» бикIуси нешла мезла конкурслизиб хIябъибил мер буциб, – ил хIядурбарилри «Хала бегIтала мез» бикIуси нешла мез гIердурцнила шайчибси Фондли.

Илини РФ-ла прокуратура 300 дус биънила тарихлис  хасбарибси конкурсличиб  назму белчIи, цаибил мер  сархиб ва Ахъушала  районна  прокуратурала шайзивад   Грамоталичил шабагъатлавариб.

Культурала управлениела шайзивад Баркаллала кагъарличил шабагъатлавариб культурала управлениелизир детурхути  шадлихъуназир  жигарла бутIакьяндеш дирнилис.

«Белые Журавли» бикIуси районна кьадрила Расул  ХIямзатовлис хасбарибси конкурслизив «О, Родина» бикIуси  назму бегIлара гIяхIил белчIунси илис культурала  ва туризмала управлениела Профсоюзла шайзибад  Грамота  бедиб. Расул ХIямзатовлис багъишлабарибси «Мой Дагестан» бикIуси МяхIячкъалализиб бетерхурси  республикала  кьадрила  конкурслизиб хIябъибил мер сархиб, «Мой край огромным не зови» бикIуси назму  белчIи.

– Расул ХIямзатовла назмурти ГIябдуллагьлис дебали дигахъутазирад цадехI сари, – рикIи илала неш ПатIимат.

ГIябдуллагьла неш ПатIимат БяхIяндова Ахъушала  больницала  отделениелизир акушер-гинекологли рузули сари,  дудеш Зайпадинов Зайпадин 2006-ибил  дусличивад ЦСЗН-на управлениелизив  узули  сай.

Духути, малхIямти, адамдешличил хIербирути  бегIтани  ГIябдуллагьлис гIяхIси бяркъ бедили, къугъали алкьули сай, сунела пагьмура гIеббуцили, гьатIира имцIабиахъес гьар шайчибад кумекбикIули саби.

ГIябдуллагь гьарра шайчивад  пагьмучевси сай, спортла абзаначивра гьаларти мераначи лайикьвиркули вирар. 2022 ибил дуслизив боксла шайчирти абзаназив кIиибил мерличи  лайикьвикили, ДЮСШ-ла директорли Грамоталичил  шабагъатлаварибсири.

Гьаннала гIергъира ГIябдуллагьла пагьму имцIабикIули ва илала бегIтас гьарбизуни, арадеш, гIяхIдешуни диубли  хIербиэс кьадарбиаб.

С.ГIябдуллаева