ИшбархIи нушала ул­­­­кализиб ба­хъал адамти де­ба­ли мис­кин­биубли саби. Ца­ца­дехI­­ти ба­ян­ти хIясибли, ил­дала лугIи 30 мил­лион адам­ли­чи абир­кули саби. Илдани кай­су­си хайри чула берк-бержлис харж­барес саби биуси. Палтар-кьяш асесалра биули ахIен. Ну­ша­ла улкализиб багьуди ва ме­дицина матъал са­ри или би­кIули саби. Гьарли-мар­ли би­ал­ли, илдасра дахъал хар­жани хIя­жатли сари. Къиянти опе­ра­цияби дарес нушала па­ча­лихъ­ли­зиб бирули ахIен. Ду­ра­ла па­чалихъуназир биалли, илдас дахъал арц тIалабдирули са­ри. ХIера, илгъуна манзил да­кIудиубли сари нушала ул­ка­ли­зир кумекбирути гIяхI­баркь­ла фондани.

Гьаланачи наб илдигъунти фондани акIнила тарихличила бурес дигулра. Адамтас ва кумек хIяжатти организациябас икьалабирнила тарих Киевла Русьлизиб христианство акIниличил бархбалсахъули са­би. Князь Владимирли 996 ибил дуслизиб динна агьлулис, ки­ласабас ва больницабас кумеклис десятина (сурсатуни) декIарбарахъес хъарбарибсири. Даршани дусмазиб Россиялизиб киласали сабри чулахъунас ва мискинтас кумекбируси. Иван Грозныйла замана ку­мекбирнила тяхIяр-кьяйда па­чалихъла хIяракатлизи кадурхахъули сари. Дуракайули сари хIяжаттас кумекбирниличи дяхIчиаибти хIукмурти, ал­кIахъули сари гIяхIбаркьла уч­реждениеби, сарира пача­лихъ­ла харжаначил дузахъути. Илдала хIянчилизир бутIа­кьян­деш дарес дигуси адамли ви­русири.
1635 ибил дуслизиб пача М.Федоро­вич­ли мурул адам­тала киласа белшахъес матъал ванза декIарбирули са­би. Пача Алексейли мискинтас кумекбира­хъес хасти организацияби ал­­кIахъули сари. Байрумтас яра дургъбазиб чедибдеш сарх­­нилис багъишлабарили, па­ча туснакълизи, больницаба­зи, мискинти хIербирути юр­танази вашусири, садакьа буртIусири. Пачачибад гIибрат кайсусири давлачебти адам­тани ва жавабла къуллу­къу­начибти хIянчизартани. Па­чала насихIятчи Ф.Рти­щевли пачалихъла ва вегI­деш­ла гIяхIбаркьла организа­ци­яби дархдяхъес къайгъи да­кIубирули саби. Речь Поспо­ли­таличил ва Швецияличил дургъби кадиркуси манзил (1654-1656-ибти дусми) Ф.Рти­щевли бяхъибти солдатунас больницаби ибхьули сари. Ил­дазиб сагъбирулри ясирбуцибти бургъантира. Пачалихъла ва сунела арцлис илини Рос­сияла бургъанти ясирлизибад исулри. Илкьяйдали, илала сипта хIясибли, Москвала кьакьурбазибад чулахъуни, бухънаби, цацахIели держла изайзи бикибти цахIнабяхъили, хасти юртанази бикутири ва хIер­бирутири.
1682 ибил дуслизиб пача Федор Алексеевичли хIукму би­рули сай хIеруди агарли ка­лунти дурхIнас хасдарибти хъулри абхьахъес. Илдазиб илди бучIахъутири ва де­кIар-­декIарти санигIятуначи бегI­би­ру­тири.
Петр I-ибилли гьарли-марли кумек хIяжаттас хас­ти юртани лушахъули сай. Па­ча­лихъла харжаначил илдас кумекбирули сай. Чула са­би хIербиэс хIебирутас ва чу­лахъунас кумекбирахъес хар­­жани декIардирули сари. ХIук­­мубирули саби мискинти больницабазиб матъал ара­­бирахъес. Илкьяйдали дургъ­­бала ветерантасра ва гIяр­­миялизибад хъули бар­хьиб­­ти хIербирахъесра хар­жа­­ни чедаахъибтири. Иличил барх пачалихъли дебали тан­бихIлабирутири «къал­п­ла» мискинти, садакьа тIа­лаб­би­ру­ти вайнукьаби. Илкьяйдали давлачебти адамтанира мис­кин­ти-чулахъунас хасдарибти декIар-декIарти фондани ал­кIахъутири. Илгъуна аги бу­зусири 1917 ибил дуслизиб революция бетерхайчи. Ле­рилра Фонданала лебдеш пачалихъли кебасибсири. Совет хIукуматли кумек хIя­жат­ти адамти пачалихъла хIе­ру­ди­лиуб биэс хIяжатли саби или багьахъурсири. Дургъбала ман­зил бахъал хIеруди агарли калунти цIуръа дурхIни леб­тири. Илдас хасдарибти юр­та­ни алкIахъутири. Иличил барх дурхIнас кумекбируси, Ле­нинна у бихуси Фондра леб­си­ри. Илизи адамтани чула арц дедлугутири. ЧебяхIси Ва­тIа дергъла замана адамтани гIярмиялис хIяжатси ярагъ аса­хъес чула лебдеш бедлугусири.
СССР-ла улка пашкабехъуб­ли гIергъи, Россиялизир сага­дан гIяхIбаркьла Фондани дакIудирес дехIдихьиб. Ам­ма, имцIаливан, илди арц ди­гIяндирес ва дурала пачали­хъу­нази ардихес багьандан алкIахъутири. Лертири гьар­ли­-марли хIяжаттас кумек гIеб­биахъути цахIнабикунира. Ил­ди дебали камли сари. Дила ма­кьалализир наб гIяхIбаркьла Фон­данала уми делкIес дигули ахIенра. Чидил къалпла сабил, чи­дил марсил нуни буресра хIейрус.
Нушала республикализир­ра илдигъунти организация­би дебали дахъал сари. Баянти хIясибли, даршани лер. Ца­ца­дехIтала руководительтани чули барибси кумек СМИ-базиб чебиахъули саби. Мискинти камерализи хIербикIахъули баркалла бикIахъули саби. Кумек сабира ил? ИшбархIи Интернет дебали гьалабяхI арбякьи саби. Илис сабаб­ра, адамтала имкан леб ишбархIи сунес дигусигъуна гаджет асес. Халкьла ургар дебали машгьурли саби ««Одноклассники», «Контакты», «Фейсбук», «Инстаграм» ва цархIилти дахъал социальный сетани. Илдазибадра, гьар бархIи, кумекбарая или дугьабилзути бахъал саби. Лер нушани кумекбирусину, Фондлис икьалабарая бикIутира. Илдала бузери ахтардибируси яра илдачи хIеруди бируси чилра агара. Нушала республикализир дахъал илдигъунти фондани гIекIибтири. Нушала адамти кумекбарес, музабухъес мурталра хIядурти саби. ЦацахIели илдани, пикрихIебухъи, чебаахъибси счетличи арц дурхьули сари. Илди вайнукьабани сари кайсути. Наб бурес дигуси: хIушала арц дархьес гьалар ахтардибиреная, гьарли-марли хIяжатсил кумек, тIалаббиреная адрес.
Телевизорлизирадра дирар кумек хIяжатли саби или ба­лахъути гIяхIцад багьахъни­би. ИлхIелира марсил ил багьахъни ахтардибирес чебир­кур. Ну кумек мабиридая ви­кIули ахIенра. Бусурман адам­личиб хъарси саби ятимлис, мискиннис кумекбирес. Ил­дигъунти нуша-алав дебали бахъал саби. Нушани нуша-алав хIербирути ва кумекличи хъарти балути саби. ХIебиалли, илдас кумекбарая, хIебалуси счетличи арц дурхьесила мерлаб.
Нушала улка дебали давлачебси саби. Буралли, Адам (илала хIяжатуни) мурталра улкализив чевяхIсили чевиэсра гIягIниси сай. ХIякьикьатлизиб аги биалли, декIарси саби. Нушала улкализиб давла лебтала саби кьуватра чебиуси. Гьачамлис… Бирхауди леб аги барс­бир­ниличи.
Наб ишгъуна агиличилара бу­рес дигулра. Ну шагьуртала кьа­кьурбикад вашухIели, жагьилти ва ара-сагъти адамти някъ гьабуцили яра кумекбарая би­кIути чебиули вираси. Гьан­на би­алли илдигъунти ши­мазибра да­кIу­бирули саби. ЦIахли ахIену илдас. ХIянчи дарес дигули ахIен. Къиян кахIесили, давла сархес дигули саби. Шимазир дахъал ванзурби хIедаци лайкадакIили чедиур. Жагьилтас биалли ванзаличиб хIянчи барес, мицIираг адикьес дигули ахIен. Бахъал хъям­лизи ихъули саби. Вайнукьабала гьунчи кабилзули саби. Сабаб – бегIтани ва жамигIятли че­алкIуси наслуличи хIяжатси пик­ри бяхIчихIейни, жагьилтас хас­барибси политика пачалихълизиб хIярхIли тIашбатни, школабазиб яра динна агьлули жагьилтачил бируси иргъахънила хIянчи хIярхIбиъни саби. Че­алкIуси наслулизи жигарла бу­тIакьяндеш дирахъес гIягIнили саби жамигIятла гIямрулизир. ИлхIели камбирар кумек хIяжатти ва мискинти адамтира. Нушани аргъес чебиркур, мискин адамти дакIубирути саби хъямI-кьацIбикIути, рушбатуни сайсути хIякимти ва организацияби лерти пачалихъуназир. Закон бузниличила ва хIукумат чула хъарихъ биъниличила халкьли балули биалли, жамигIят гьалабяхI башар.