Ахъушала районна ХIинтIала шилизивадси ЧебяхIси ВатIа дергъла бутIакьянчи МяхIяммадов Хизри МяхIяммадович акIубсири 1915 ибил дуслизив.
Хизри МяхIям­мадов ургъули калун Белоруссияла цаибил фронтла 8-ибил гвардияла цIали иртути ярагъ пайдаладируси батальоннизив.
1944 ибил дусла августлизиб Польшала мер-мусаличиб, Висла хIеркIла мякьлаб кабикибси цIакьси дявилизиб, илини хасти ярагъличил иртули, 20 душман къирбарили, 16 гьужум тIашаили сай. Ил дусла сентябрьла 7-личив гъабзадешличил ургъули, гьунарти чедиахъни багьандан, Хизри МяхIяммадов III-ибил даражала Асилдешла орденничил шабагъатлаварибсири.
1945 ибил дусла февральличив, отделениелис бекIдеш дируси Х.МяхIяммадовли Польшала Познань бикIуси шагьарла мякьлабси мер-мусаличив дигIянали вашули, фашистунала артиллерияла ярагъличи ветаили, илала ярагъ цIали дигахъубтири. ГIур автоматличил 10 фашистра кабушибтири. 1945 ибил дусла март базличив Х.МяхIяммадов II-ибил даражала Асилдешла орденничи лайикьвикибсири.
1945 ибил дусла апрель базличив Берлин шагьар бурцухIели, сунени бекIдеш дируси отделениеличил барх Х.МяхIяммадовли 20 фашист кабушибтири, бахъал ясирбуцибтири.
1945 ибил дусла майла 31-личиб СССР-ла Верховный Советла Указ хIясибли, Германияла гъармукабачил гъабзадешличил ургъули, гьунарти чедаахъни багьандан Хизри МяхIяммадов I-ибил даражала Асилдешла орденничил шабагъатлаварили сай. ХIинтIала шилизивадси гIяхIгъабза ургъан Хизри МяхIяммадовли, Чедибдеш сархес багьандан кабихьибси пай хIукуматла пикрила дураб кахIелун, ва ил Асилдешла хIябалра орденничил шабагъатлаварибсири.
Дергълис гIергъити дусмазивра ил колхозлизив район гьалабяхI арбукес багьандан дуги-хIери цадарили узусири, бунагь-хатIа урдуцаб сунела!