ХIясанов МяхIяммад ГIялиевич акIубсири 1925 ибил дуслизив, ХIям­­шимала шилизив, хIурматла хъа­ли­барг­лизив.
Илини сунела бузерила гьуни бехI­би­хьиб 1941 ибил дуслизиб шила Советла секретарьли узули. ГIур узули калун Ахъушала райисполкомла цахIнабси отделла заведующийли.
1943 ибил дуслизив ЧебяхIси Ва­тIа дергълизи арякьун. Илар илини гьунарти чедаахъиб, чедибдеш сархес багьандан гъабзадешличил ур­гъули калун.
Ил зенитно-артиллерийский полк­­лизив ургъули калунсири. Къиянси биаллира, зенитная установка жявли бяркъурли, Украинала I-ибил фронтлизив ургъули калун. 1944 ибил дусла февраль базличив артиллерийский взводла командир сайливан Юго-Западный фронтлизир, Днепропетровсклизиб кабикибси цIакьси дявилизир бутIакьяндеш дариб. Польша акьубалтахъухIели кабикибси дявилизирра бутIакьяндеш дарили, Берлиннизира ветаиб ва Рейхстагла лацла бяхIлизи белкIра бариб.
Дергълизивад чарухъунсири 1945 ибил дуслизив, советский гIяскуртани ВатIанра, лебилра Европара азадбатахъурли, фашистунала Германияличибад чедибдеш сархили гIергъи. Пачалихъли илала къайгъни ва дергълизир чедаахъибти гъабзадеш кьиматладариб ва чумал шабагъатличи лайикьвикиб.
«ЧебяхIси ВатIа дергъла» орденничил, «Гъабзадеш багьандан», «Германияличибад чедибдеш сархни багьандан» медальтачил шабагъатлавариб.
ЧебяхIси ВатIа дергълизир чедаахъибти гьунарти багьандан Верховное командованиела шайчивад Грамотабачи ва Баркаллала кагъуртачи лайикьвикибсири.
Дергълизивад чарухъи гIергъи, 1946 ибил дуслизив Ахъушала райисполкомла секретарьли узес вехIихьибсири. 1952 ибил дуслизив партияла хIянчурбачи гьалавихьиб – Избербашла партияла окружкомла отделла заведующийла заместительли, Хайдакьла райкомла секретарьлира узули калун. 1957 ибил дуслизиб чебяхIси даражала партийная школа таманбарили гIергъи, КПСС-ла Дагобкомла совпартшколала парткомла секретарьли узулира калун.
1962 ибил дусличивад 1971 ибил дусличи бикайчи райисполкомла председательли ва КПСС-ла Лавашала райкомла цаибил секретарьли узиб. 1971 ибил дусличивад 1981 ибил дусличи бикайчи Ахъушала райкомла цаибил секретарьли узусири.
1981 ибил дуслизив шила хозяйствола хIянчизартала профсоюзла обкомла председательли викIибсири.
Чинав узули виалра, жавабкарси, чеветаили, хIялалли хIянчи бируси, гIяхIгъабза адам сайливан вагьурсири адамтани ва районтала халкьла ургаб халаси хIурмат сархибсири МяхIяммадли.
ДАССР-ла Верховный Советла хIябал созывла депутатлира, СССР-ла шила хозяйствола хIянчизартала профсоюзла ЦК-ла членнира калун.
Бузерила ХIунтIена байрахъла кIел орденничил, дявила ордентачил ва медальтачил шабагъатлаварибсири.
1982 ибил дуслизив гIям­ру­ли­зивад арякьун, Аллагьли бунагь-хатIа урдуцаб сунела!
Иш белкI хIядурбарахъес багьандан баянти дархьибси ХIямшимала шила урга даражала школала учительница Марьям ИсмягIиловас баркалла багьахъес дигулра. ЦацадехIти баянти Интернетлизирадра касибтири.

ХIядурбарибси — С.ГIябдуллаева