БяхIяммаев СултIан СултIанович акIубси сай Ахъушала районна ПаняхIмахьилизив 1928 ибил дуслизив.
С.БяхIяммаевли 1939 ибил дуслизиб ПаняхIмахьилизибси школа таманбариб. 1948 ибил дуслизиб шила халкь Чечентала мер-мусаличи аркуси манзиллизив ВатIайс къуллукъбарахъес живариб. ГIярмиялизибси къуллукъ таманбарили гIергъи, ил Бачиюрт шилизи, сунела гъамтачи чарухъи, колхозлизиб бузерила гьуни бехIбихьиб. Колхозлизив бригадирли узули калун, жамигIятла шайчибси хIянчира бетурхахъули.
1957 ибил дуслизиб цархIилти даргала шимала халкьличил барх ПаняхIмахьила халкьра чула ВатIайзи чарбухъахъунтири ва Первомайское бикIуси мерличиб сагаси ши барес пикрибарибсири.
СултIан БяхIяммаев шила халкьла депутатунала Советла исполкомла председатель вариб. 1966 ибил дуслизиб Ильичла уличилси колхоз, «Каспий» бикIуси чягъир далкьарахъуси совхозличи шурбатурсири. С.БяхIяммаев ил совхозлис бекIдеш дирахъес катур. Илини бекIдеш дируси тIутIи дурчуси бригада дебали гьалабяхI арбякьун.
1966 ибил дуслизиб С.БяхIяммаевлис «ХIурматла лишан» бикIуси орден бедиб. 1973 ибил дусла декабрьла 7-личиб СССР-ла Президиумла Советла Указ хIясибли ил Социалист Бузерила Игитла уличи лайикьвикиб, Ленинна орденничил ва «Кьякьра Миршра» бикIуси медальличилра шабагъатлавариб, 9-ибил шелдуслихъла план бицIахънилис ва дахъал дусмазиб хIянчи барни багьандан.
С.БяхIяммаев ДАССР-ла Верховный Советла хIяйна депутатлира калун, КПСС-ла РК-ла бюрола членнира. «ХIурматла лишан» ва «Октябрьская революцияла» ордентачи лайикьвикиб. КПСС-ла 26-ибил съездла ва профсоюзла 16-ибил съездла делегатлира калун.
С.БяхIяммаевли сай хIерируси ва узули калунси районна халкьла ургаб халаси хIурмат сархиб. Къаякентла районна Первомайское шила ца школалис С.БяхIяммаевла у бедили саби.
С.ГIябдуллаева
