ЧебяхIси Чедибдеш сархибхIейчирад 80 дус дирк­нилис хасбарили Сергокъалала дайлабси анхълизиб ЧебяхIси ВатIа дергъла ветеран, пачалихъла машгьурси хIяракатчи ГIяли МяхIяммадович Нур­бя­хIяндов гьаниркахънила уркьули абхьиб.
Балбуцличир хIукуматла органтала вакилтани, юнармейцыбани, ГIяли МяхIяммадовичла тухумтани ва районна халкьли бутIакьяндеш дариб.
Ветеран гьаниркахънила уркьули районна бекI Арсен МяхIяммадовли ва ГIяли МяхIяммадовичла уршила (рурсила) урши Билал МяхIяммадовли абхьиб. Районна бекIли дергъла игитунала хIурматбирниличила ва шаласи челябкьла биахъес, мекелли халаси пай кабихьниличила буриб. Билал МяхIяммадовли сунела хала дудешличила тамашала, уркIиличи асарбирути хабурти дуриб.
Илкьяйдали ГIяли МяхIяммадовичличила шалати пикруми, чула гьанбикуни дуриб адамла ихтиюртала шайчивси вакил Запир Алхасовлира, районна халатала ва ветерантала Советла председатель МяхIяммадсалам МяхIяммадовлира, райисполкомла председательла къуллукъуни дузахъули калунси Кьурбан Мирзаевлира.
Ветеранна хIурматлис, районна администрацияла ва депутатунала собраниела хIукму хIясибли, Сергокъалала дайлабси парклис ГIяли НурбяхIяндовла у бедес пикрибарили саби. Балбуцла ахирличиб ветеранна хIябъибил наслулизивадси урши (правнук) Камил Абакаровли хала дудешлис хасбарибси назму саркъахъили белчIун. Ветеран гьаниркахънилис хасбарибси уркьулила гьала вавнала халуби кадихьниличибли балбуц ахирличи бикахъиб.
ГьанбуршехIе, ГIяли МяхIяммадович НурбяхIян­дов­ли, дергъ таманбиубли гIергъира, улка кьяшмачи тIаш­балтнилизир жигарла бутIакьяндеш да­риб­ти­ри, Сер­гокъалала райкомла цаибил секретарьла къул­лукъуни дузахъули, район социальный бяхI­чи­бизлизиб ва экономикала шайчиб гьалабяхI башахъусири. 1973 ибил дуслизив ГI.НурбяхIяндов ДР-ла ва­цIала хозяйствола министр­ла къуллукъличи катурсири.