ЧебяхIси Чедибдешла юби­лейлис хас­ба­рили бетурхуси «Ве­те­ранничи гIяхIлад­ли» би­кIуси хIя­ра­катла дазурбазиб Ф.ГIя­лиевала уличил­си ЦБС-ла модельная библиотекала хIян­ч­и­зарти дургъбала ветеран Багьаудинов Муса Мусае­вич­личи гьаббакIиб. Каспийск ша­гьар­лизибси социальный бяхI­чи­бизла шайчиб адамти гIеб­бур­цуси цахIнабси центрли ил гьунибаъни гIеббуциб.
Чедибдеш сархили хъули чарбулхъути бургъантас сиреньтачил гьунибиутири. Ил гIядатли бетаурливан, ветераннис хIян­чизартани сиреньтала хала савгъатбариб.
Гьунибаънила башрилизиб Россияла Игит МяхIяммад Нур­бяхIяндовла уличилси «Отечество» бикIуси жагьилти патриотунала клубла вакилтани чедибдеш сархибти игитунас хасдарибти назмурти делчIун. Илди-ургар лерри Андрей Мельниковли, Андрей Алексеевли делкIунти ва чули дурхIнани учидяхъибти наз­мурти.
Муса Мусаевич Каспийск шагьарлизив хIерируси сай. Илала кIел узи фронтлизиб алхунтири, биалра, урехиагарли ил сай гIяхIъулали дергълизи арякьунсири. Мотострелковый полклизиб къуллукъбирули, ил гъабзадешличил Новороссийсклизив, Краснодарлизив, Донничибси Ростовлизив ургъули калунсири. Чуйнара ил вяхъибсири ва Ворошиловградла (гьаннала Луганск) госпитальлизив сагъвирули калунсири.
Ил гьунибаъни – лебилра ВатIан балтахъантала гъабзадеш чихъли кьиматладирнилис бикьрили бетарули саби.
БурахIелли, Муса Багьаудинов акIубси сай 1924 ибил дуслизив БурхIимякьмахьилизив. ЧебяхIси ВатIа дергъ бехI­би­хьиб­хIели, илала кIелра халатигъунти узи фронтлизи арбякьунтири. Камси замана бикили гIергъи, ца узи алхниличила, цархIил къел-хIерзи агарли веткахъниличила илини багьур. Илди аварала шайчив калес хIейубси М.Багьаудинов МяхIячкъалализи вакIили, сай гIяхIъулали фронтлизи укьес дигнила кагъар белкIунсири. Ветеранни гьанна бурули кьяйда, ил бурсивирнила манзил бухъянхIебитIун. Секьяйда тупангличил пайдалавикIусил ва къяйкикIусил чебаахъили, цархIилти дагъистанлантачил варх вокзаллизи укили, Белоруссияла Гродно бикIуси шагьарлизи вархьибсири. 1945 ибил дусла ахирличив сунела биштIаси ВатIайзи ил чарухъунсири. Дахъал дусмазив ил колхозлизив узули калунсири. Муса Багьаудинов ЧебяхIси ВатIа дергъла 1-ибил даражала орденничил, «Гъабзадешлис», «1941-1945 – ибти дусмазиб ЧебяхIси ВатIа дергълизиб Германияличибад чедибдеш сархнилис» бикIути ва дахъал цархIилти медальтачил шабагъатлаварибси сай.
Муса Багьаудиновлис чIу­маси арадеш булгулра.

Мадина Темирова